ಮಾನಸ ಸರೋವರ

ಸೌರ ದೀಪ - ೨

2011-02-12T21:26:00.004+05:30

ನಾನು ಸೌರ ದೀಪದ ಹುಚ್ಚು ತಲೆಗೆ ಹಚ್ಚಿಸಿಕೊಂಡು ಡಿಲೈಟ್ ಕಂಪನಿಯ "ನೋವ" ದೀಪ ಖರೀದಿಸಿದ ನಂತರ ಬಿಡುಗಡೆಯಾದ ಸೌರ ದೀಪ ಇದು. ಅದೇ ಹುಚ್ಚಿನಲ್ಲಿ ಕೊಂಡುಕೊಂಡೆ. ಇದು ಪ್ರಪಂಚದಲ್ಲೇ ಅತ್ಯಂತ ಕಡಿಮೆ ಬೆಲೆಯ ಸೌರದೀಪ. ೫೫೦ ರೂಪಾಯಿಗೆ ಕೊಂಡುಕೊಂಡ ಈ ದೀಪವು ಬಹಳ ಒಳ್ಳೆಯ ಸೇವೆಯನ್ನು ನೀಡುತ್ತಿದೆ. ಈ ದೀಪದಲ್ಲಿ ನನಗೆ ಹೆಚ್ಚು ಖುಷಿ ಕೊಟ್ಟ ವಿಚಾರವೆಂದರೆ ಅದರ ವಿನ್ಯಾಸ. ನೀರಿನ ಬಾಟಲಿಯಾಕಾರದಲ್ಲಿರುವ ಇದು ಸೌರ ತಟ್ಟೆಯನ್ನೂ ಒಳಗೊಂಡಿದೆ. ಚಿಮಣಿ ದೀಪದ ಪರ್ಯಾಯವಾಗಿ ಬಳಸಲು ವಿನ್ಯಾಸಗೊಳಿಸಲಾಗಿದೆ. ಇದನ್ನು ನೋಕಿಯ ಚಾರ್ಜರ್‌ನಿಂದ ಕೂಡ ಚಾರ್ಜ್ ಮಾಡಿಕೊಳ್ಳಬಹುದು. ಇದಕ್ಕೆ ಹಲವಾರು ಪ್ರಶಸ್ತಿಗಳು ಸಹ ಬಂದಿದೆ.

ಇದೇ ಹುಚ್ಚಿನಲ್ಲಿ ಮತ್ತೊಂದು ದೀಪ ಕೊಂಡುಕೊಂಡಿರುವೆ. ಅದನ್ನು ಮುಂದಿನ ಲೇಖನದಲ್ಲಿ ಕಾಣುವಿರಿ...

ಹೊಸ ವರ್ಷದ ಶುಭಾಶಯಗಳು

2011-01-01T00:42:00.002+05:30

ನಿದ್ದೆ - ವಿದ್ಯೆ

2010-11-25T19:16:00.000+05:30

ಕಪ್ಪನೆ ರಾತ್ರಿ ಮಲಗಿತ್ತು
ನಿದ್ದೆಯ ಜೋಂಪು ಹತ್ತಿತ್ತು

ಎಲ್ಲರು ನಿದ್ದೆಯ ಮಾಡಿರಲು
ನಾನೊಬ್ಬ ಪುಸ್ತಕ ಹಿಡಿದಿರಲು
ನಿದ್ದೆಯ ಜೋಂಪು ಹತ್ತಿತ್ತು

ಬೆಳ್ಳನೆ ಬೆಳಕು ಹರಿದಿರಲು
ನಿದ್ದೆಯು ನನ್ನ ಬಿಡದಿರಲು
ಎಲ್ಲರು ಎದ್ದು ಓದಿರಲು
ನಾನೊಬ್ಬ ನಿದ್ದೆ ಮಾಡಿರಲು

ಪ್ರತಿ ದಿನ ಹೀಗೆ ಸಾಗಿತ್ತು
ಓದುವುದ್ಹಾಗೆ ಉಳಿದಿತ್ತು

ಋತುಗಳು ಎಲ್ಲಾ ಉರುಳಿರಲು
ಪರೀಕ್ಷಾ ಋತುವು ಬಂದಿರಲು
ನಿದ್ದೆಯು ನನ್ನ ಬಿಡದಿರಲು
ಓದುವುದ್ಹಾಗೆ ಉಳಿದಿತ್ತು.

ಪರೀಕ್ಷೆಗಳೆಲ್ಲಾ ಮುಗಿದಿರಲು
ಪರಿಣಾಮಕ್ಕಾಗಿ ಕಾದಿರಲು
ಬಂದಿತು ಪರಿಣಾಮ ನಾಪಾಸೆಂದು
ಓಡಿತು ನಿದ್ದೆ ನಾ ಇರೆನೆಂದು

೧೯೯೩

ಸೆಕ್ಸಿ "ಸೂರ್ಯ"

2010-10-01T19:55:00.000+05:30

ಕ್ಯಾಬು ಹತ್ತಿ ಕುಳಿತ ನಮ್ಮ ಸೂರ್ಯನು
ಬೆಲ್ಟು ಹಾಕಿಕೊಂಡು ನಿದ್ರೆ ಮಾಡುತ್ತಿದ್ದನು

ಹಂಪಿನಲ್ಲಿ ಮೇಲೆ ಎಗರಿ ಬೀಳುತ್ತಿತ್ತು ಬಂಡಿಯು
ತೂಕಡಿಸಿ ಸೀಟಿಗೆ ಹೊಡೆಯುತಿತ್ತು ಅವನ ಮಂಡೆಯು

ಸಿಗ್ನಲಲ್ಲಿ ಬಂದು ನಿಂತಿತು ಕ್ಯಾಬು ಕಸದ ಲಾರಿಯ ಹಿಂಬದಿ
ಕಸದ ನಾತ ಮೂಗು ಬಡಿದು ಎದ್ದ ಸೂರ್ಯ ಮುಂಬದಿ

ಎದ್ದ ಒಡನೆ ಯಾರೋ ಸೂರ್ಯನನ್ನು "ಮಾಮ, ಮಾಮ" ಎಂದು ಕರೆದರು
ಕ್ಯಾಬಿನಲ್ಲಿದ್ದವರು ನಪುಂಸಕರನ್ನು ಕಂಡು ಬಾಯಿಗೆ ಬೀಗ ಜಡಿದರು

ಅರೆ ನಿದ್ರೆಯಿಂದೆದ್ದ ಸೂರ್ಯನ ಕಣ್ಗಳು ಕಂಡವು ಕೆಂಪಗೆ
ಕನಸಿನಲ್ಲಿ ಬಂದ ರಂಭೆ ಎದುರು ನಿಂತಂತಾಗಿ ಆಯ್ತು ಕಣ್ಣು ತಂಪಗೆ

ಬಿಟ್ಟ ಕಣ್ಣು ಬಿಟ್ಹಾಗೆ ನೋಡುತ್ತಿದ್ದ ಸೂರ್ಯ ನಪುಂಸಕರನು
ಸಿಟ್ಟಿನಿಂದ ನಪುಂಸಕ "ಸೆಕ್ಸಿ ಐಸ್" ಎಂದು ಜಾರಿಕೊಂಡನು

ರಂಭೆ ಕೊಟ್ಟ ಬಿರುದಿಗೆ ನಮ್ಮ ಸೂರ್ಯ "ಥ್ರಿಲ್" ಆದನು
ಅಂದಿನಿಂದ ನಮ್ಮ ಸೂರ್ಯ "ಸೆಕ್ಸಿ ಸೂರ್ಯ"ನಾದನು.

೨೦೧೦-೦೯-೩೦

ನಿನ್ನಲ್ಲಿದೆ ಅಪಾರ ಶಕ್ತಿ

2010-07-25T21:34:00.002+05:30

ನಿನ್ನಲ್ಲಿದೆ ಅಪಾರ ಶಕ್ತಿ

ಚಿಂತೆಗೀಡಾದೆಯಾ ಮನವೇ?
ಬಳಲಿ ಬೆಂಡಾದೆಯ ತನುವೇ?
ಇದೇಕೆ ನಿರ್ಜೀವವಾಗಿ ಕುಳೀತಿರುವೆ?

ಏಕೆ ಹೀಗೇಕೆ ಅಳುತಿರುವೆ?
ಸತತ ಸೋಲಿನಿಂದ ನಿರಾಶೆಯಾದೆಯಾ?
ನಿರತ ಪ್ರಯತ್ನದಿಂದಲೂ ಸೋತೆಯಾ?

ಅಳಿಸಿ ಹಾಕು ನಿನ್ನೊಳಗಿನ ಅಪ್ರಯೋಜಕನೆಂಬ ನಿಂದನೆ
ನಿನಗೆ ಶೋಭಿಸದು ಈ ಹತಾಶ ಭಾವನೆ
ಚಿಗುರಿ ಚಿಮ್ಮಲಿ ನಿನ್ನಲ್ಲಿ ಉತ್ಸಾಹದ ಚಿಲುಮೆ
ಹೊಸತನಕ್ಕಾಗಿ ಸದಾ ಮುಡಿಪಾಗಿರಲಿ ನಿನ್ನ ಒಲುಮೆ
ಏಳು ಎದ್ದೇಳು ನಿನ್ನಲ್ಲಿದೆ ಅಪಾರ ಶಕ್ತಿ

ಕಾಯದಿರು ಯಾವ ಹೊರಗಿನ ಸೂರ್ಯನಿಗಾಗಿ
ನಿನ್ನೊಳಗೇ ಅಡಗಿಹನವನು ಬೆಳಗುವುದಕ್ಕಾಗಿ
ಧೈರ್ಯದಿಂದ ಮನ್ನುಗ್ಗು ಬರಲಿ ಯಾವ ಅಡ್ಡಿ ಆತಂಕ
ಛಲದಿಂದ ಹೋರಾಡು ನೀ ಕೊನೆಯ ತನಕ

ಗೆಲುವು ಆಗಲಿ ನಿನ್ನ ಕಾಲ್ಚೆಂಡು
ಈ ಪ್ರಪಂಚ ಅಚ್ಚರಿ ಪಡಲಿ ನಿನ್ನನ್ನು ಕಂಡು
ಏಳು ಎದ್ದೇಳು ನಿನ್ನಲ್ಲಿದೆ ಅಪಾರ ಶಕ್ತಿ.

೨೦೦೨

ನೊಕೆರೊ – ೧೦೦

2010-06-12T10:43:00.003+05:30

ನೊಕೆರೊ ೧೦೦ – ಇದು ಮಾರುಕಟ್ಟೆಗೆ ಬಿಡುಗಡೆಯಾಗಿರುವ ಹೊಸ ಸೌರ ದೀಪ. ಇದರ ವಿಶಿಷ್ಟತೆ ಏನೆಂದರೆ ದೀಪದಲ್ಲೇ ಸೌರ ಫಲಕ ಅಡಗಿರುವುದು. ಹಗಲು ಬಿಸಿಲು ಕಾಯಿಸಿ ಇರುಳು ಬೆಳಕು ನೀಡುವ ದೀಪ, ಮಳೆ ನೀರಿನಿಂದ ಹಾಳಾಗದಂತೆ ತಯಾರಿಸಲಾಗಿದೆ. ಇದರ ಬೆಲೆ ೧೫ ಅಮೆರಿಕನ್ ಡಾಲರ್ ಅಂದರೆ ೭೦೨ ರೂಪಾಯಿಗಳು. ದೀಪ ತೂಗು ಹಾಕಲು ಕೊಂಡಿ ಲಭ್ಯ. ಇದರಲ್ಲಿ ಐದು ಎಲ್.ಇ.ಡಿ ಬಲ್ಬ್ಗಳು ಇದೆ. ಒಂದು ದಿನ ಬಿಸಿಲಿನಲ್ಲಿ ಕಾಯಿಸಿದರೆ ೨ ಗಂಟೆಗಳ ಸತತ ಬೆಳಕು ಲಭ್ಯ. ಇದರ ಬ್ಯಾಟರಿ ಎರಡು ವರ್ಷಗಳವರೆಗೆ ಬಾಳಿಕೆ ಬರುತ್ತದೆ.

ಈ ದೀಪ ಜನಪ್ರಿಯಗೊಳ್ಳಲು ಇನ್ನು ಹೆಚ್ಚಿನ ವೈಶಿಷ್ಟ್ಯಗಳನ್ನು ಹೊಂದಬೇಕು ಎಂಬುದು ನನ್ನ ಅನಿಸಿಕೆ. ಮಳೆ, ಚಳಿಗಾಲಗಳಲ್ಲಿ ಸೂರ್ಯನನ್ನು ಮೋಡ ತಡೆದಾಗ ವಿದ್ಯುತ್ ಇಲ್ಲದಿದ್ದಾಗ ಅಷ್ಟು ಉಪಯುಕ್ತವಾಗಿರಲಾರದು. ಇದನ್ನು ನಿವಾರಿಸಲು ಇದಕ್ಕೆ ಒಂದು ವಿದ್ಯುತ್ ಚಾರ್ಜರ್ನಿಂದ ಚಾರ್ಜ್ಮಾಡಿಕೊಳ್ಳವ ವ್ಯವಸ್ಥೆ ಆಗಬೇಕು. ಈ ದೀಪ ೨ ಗಂಟೆಗಿಂತ ಹಚ್ಚಿನ ಸಮಯ ಬೆಳಕುಕೊಡುವಂತೆ ರೂಪಿಸಬೇಕಾಗಿದೆ. ಇದರ ಬೆಳಕು ಹೆಚ್ಚು ಸಮಯ ಬರುವಂತಾಗಲು ೫ ಎಲ್.ಇ.ಡಿ ದೀಪಗಳು ಒಮ್ಮೆಲೆ ಉರಿಯುವ ಬದಲು ಒಂದರಿಂದ ಐದು ಎಲ್.ಇ.ಡಿ ದೀಪಗಳು ಬೆಳಕಿನ ಅವಶ್ಯಕತೆಗೆ ತಕ್ಕಂತೆ ಉರಿಯುವಂತಹ ವ್ಯವಸ್ಥೆಯಾಗಬೇಕಾಗಿದೆ.
ದೀಪದ ವಿವರ - http://nokero.com/index.php
ಚಿತ್ರ ಕೃಪೆ: www.engadget.com

ಉಧ್ಭವ

2009-12-31T16:35:00.003+05:30

ಈ ಚಿತ್ರದಲ್ಲಿರುವ ಮರ ಬೆಂಗಳೂರಿನ ಹಳೇ ಮದರಾಸು ರಸ್ತೆ, ಬೆನ್ನಿಗಾನಹಳ್ಳಿಯಲ್ಲಿರುವ ಮೆಟ್ರೋ ನಿಲ್ದಾಣದ ಬಳಿ ಇದೆ. ಸುತ್ತೆಲ್ಲ ಮರಗಳನ್ನು ಕಡಿದ ಮೆಟ್ರೋ ಕಾಮಗಾರಿಯವರು ಇದನ್ನು ಹಾಗೇ ಬಿಟ್ಟಿದ್ದಾರೆ. ಆಲದ ವೃಕ್ಷವಾದ್ದರಿಂದ ಅದನ್ನು ಕಡಿಯದೇ ಹಾಗೇ ಬಿಟ್ಟಿರಬಹುದು. ಪ್ರತಿ ದಿನ ಕಛೇರಿಗೆ ಈ ಮಾರ್ಗವಾಗಿ ಪಯಣಿಸುತ್ತಿದ್ದರಿಂದ ಒಂದು ದಿನ ಇಷ್ಟೊಂದು ಸೊಂಪಾಗಿ ಬೆಳೆದ ಮರ ಹಾಗೇ ಉಳಿದಿದೆ, ಮುಂದೊಂದು ದಿನ ಒಂದು ಸಣ್ಣ ಗುಡಿ ಹಾಗೂ ಪೂಜೆ ಪಡೆಯಲು ಎಲ್ಲ ಅರ್ಹತೆಯನ್ನು ಪಡೆದಿದೆ ಎಂದು ಮನದಲ್ಲಿ ಅಂದುಕೊಂಡು ಸಾಗಿದೆ. ಮರು ದಿನವೇ ಆಶ್ಚರ್ಯ, ಈ ಮರಕ್ಕೆ ಪೂಜೆ, ಪಾನಕ ವಿತರಣೆ! ಮುಂದೆ ಇಲ್ಲಿ ಮೆಟ್ರೋ ರೈಲು, ಬಸ್ಸು ನಿಲ್ದಾಣ ಪ್ರಾರಂಭವಾದಾಗ ಇಲ್ಲಿ ಒಂದು ಗುಡಿ “ಉದ್ಭವ”ಗೊಂಡರೂ ಆಶ್ಚರ್ಯವಿಲ್ಲ.

ಕನ್ನಡಿಗರಿಗೆ ಕನ್ನಡಿಗರಿಂದ ಕೆಲಸ!

2009-11-11T23:16:00.003+05:30

ಇತ್ತೀಚೆಗೆ ನನ್ನ ಮೊಬೈಲ್‌ಗೆ ವಿವಿಧ ಸಂಸ್ಥೆಗಳಿಂದ ಜಾಹೀರಾತು ಕರೆಗಳು ಹೆಚ್ಚಾಗಿ ಬರಲಾರಂಭಿಸಿವೆ. ಅದರಲ್ಲೂ ಕರ್ನಾಟಕದಾಚೆಯಿಂದಲೂ ಕರೆಗಳು ಬರಲಾರಂಭಿಸಿವೆ. ಅವರಲ್ಲಿ ನಾನು ಕನ್ನಡದಲ್ಲಿ ಮಾತನಾಡಲು ಅವರು ಆಂಗ್ಲ, ಹಿಂದಿ, ತಮಿಳು, ತೆಲುಗು ಗೊತ್ತಾ ಎಂದು ಕೇಳುತ್ತಾರೆ. ಯಾಕೆ ಕನ್ನಡ ಬಲ್ಲವರು ಇವರಲ್ಲಿ ಇಲ್ಲವೇ? ಎಂದು ಯೋಚಿಸಿದಾಗ ಸಿಕ್ಕ ಉತ್ತರ ನಮ್ಮ ಉದಾರೀ ಬುದ್ಧಿ. ನಾವು ಅವರೊಡನೆ ಆಂಗ್ಲದಲ್ಲೋ, ಹಿಂದಿಯಲ್ಲೋ... ಮಾತನಾಡಿ, ಈ ಉದಾರ ಬುದ್ದಿಯಿಂದಲೇ ಒಬ್ಬ ಕನ್ನಡಿಗನಿಗೆ ನಾವು ಕೆಲಸದ ಅವಕಾಶ ತಪ್ಪಿಸುತ್ತಿದ್ದೇವೆ. ಆದ್ದರಿಂದ ದಯಮಾಡಿ ಇನ್ನು ಮುಂದೆ ಎಲ್ಲಾ ಜಾಹೀರಾತು ಕರೆಗಳಿಗೂ ಕನ್ನಡದಲ್ಲೇ ಉತ್ತರಿಸಿ ಕನ್ನಡಿಗನಿಗೆ ಕೆಲಸ ಕೊಡಿಸಬೇಕಾಗಿ ಕೋರಿಕೆ.

ಜಾಹೀರಾತಿನ ಹುಡುಗಿ

2009-09-03T23:31:00.000+05:30

ದಿನದ ಕಾಯಕ ಮುಗಿಸಿ
ಮೇಲ್ಸೇತುವೆ ಮೇಲೇರಿ ಬಂದಾಗ
ನಿನ್ನ ನಗು ಮೊಗವ ಕಂಡು
ಹಾರಿತೆಲ್ಲ ಆಯಾಸ

ನಿನ್ನ ಮುಗುಳ್ನಗುವಿನಲ್ಲಿ
ಇಣುಕುತ್ತಿರುವ ಹಲ್ಲುಗಳು
ಆ ನಿನ್ನ ವದನಾರವಿಂದದಿ
ಹೊಳೆಯುವ ಕಣ್ಣುಗಳು

ತಪ್ಪಿಸಿ ಸಾಗಲಿ ಹೇಗೆ
ಸಾಗಿದೆನಾದರೆ ಏನೋ ಕಳೆದುಕೊಂಡ ಭಾವನೆ
ನಿನ್ನ ಕಂಡಿಲ್ಲವಲ್ಲ ಎಂದು ಪದೇ ಪದೇ
ಹೇಳುವ ಮನಸ್ಸಿನ ಚಿಂತನೆ

ಸೌರ ದೀಪ

2009-05-20T01:41:00.005+05:30

ಹಿಂದಿನ ಬಾರಿ ಸೌರ ದೀಪದ ಬಗ್ಗೆ ಬರೆದಿದ್ದೆ. ಇತ್ತೀಚೆಗೆ ಸೌರ ದೀಪ ಕೊಳ್ಳುವ ಅಭೀಪ್ಸೆ ಹೆಚ್ಚಾಗಿ ಅದರ ಬಗ್ಗೆ ಹೆಚ್ಚಿನ ಹುಡುಕಾಟಕ್ಕೆ ಕಾರಣವಾಯಿತು. ಅಂತರ್ಜಾಲವನ್ನೆಲ್ಲ ಜಾಲಾಡಿ ಕೊನೆಗೆ ಡಿಲೈಟ್ ಕಂಪನಿಯ ನೋವಾ ದೀಪ ಕೊಂಡಾಯಿತು. ಅದನ್ನು ಕೊಳ್ಳಲು ಇದ್ದ ಕಾರಣಗಳು - ೧. ದೀಪ ಎಲ್.ಇ.ಡಿ (ಲೈಟ್ ಎಮಿಟಿಂಗ್ ಡಯೋಡ್) - ಇದು ಸಾಮಾನ್ಯ ಸಿ.ಎಫ್.ಎಲ್ ಗಿಂತ ಹಚ್ಚು ಬಾಳಿಕೆ ಬರುತ್ತದೆ. ದಿನ ಕಳೆದಂತೆ ಎಲ್.ಇ.ಡಿ ದೀಪಗಳು ಹೆಚ್ಚು ಹೆಚ್ಚು ಉಪಯೋಗಿಸಲ್ಪಡುತ್ತದೆ ೨. ತಗಲುವ ಖರ್ಚು - ಅತಿ ಕಡಿಮೆ ದರಕ್ಕೆ ಮಾರುಕಟ್ಟೆಯಲ್ಲಿ ದೊರೆಯುವ ಸೌರ ದೀಪ ಎಂದರೆ ಇದೆ. ೩. ದೀಪದ ಬೆಳಕು - ಮೂರು ನಾಲ್ಕು ಬೆಳಕಿನ ಪ್ರಕರಣತೆ. ಹೆಚ್ಚು ಬೆಳಕು ಬೇಕೆಂದಾಗ ಹೆಚ್ಚು ಕಡಿಮೆ ಬೇಕೆಂದಾಗ ಕಡಿಮೆ ಮಾಡಿಕೊಳ್ಳುವ ವ್ಯವಸ್ಥೆ. ೪. ಈ ದೀಪದ ಹಿಂದಿರುವ ಇತಿಹಾಸ.

ಬಹಳ ಚೆನ್ನಾಗಿ ಕಾರ್ಯನಿರ್ವಹಿಸುತ್ತಿದೆ ಈ ದೀಪ. ಕೊಂಡ ಮೇಲೆ ಕಂಡುಕೊಂಡ ಇನ್ನೊಂದು ವಿಷಯ - ಈ ದೀಪವನ್ನು ವಿವಿಧ ಕೋನಗಳಲ್ಲಿ ಬಳಸಬಹುದೆಂದು. ಬಹಳ ಶ್ರದ್ಧೆಯಿಂದ, ಕಾಳಜಿಯಿಂದ ತಯಾರಿಸಲ್ಪಟ್ಟಿದೆ.

http://www.dlightdesign.com/

I will come back!!

2009-01-06T18:29:00.001+05:30

I am taking leave of you
In search of something new

You may not love me thou
I shall always love you thee

You might forget me through the times
But shall be remembered through my heartbeat rhymes

One day I will come back to you
Just to say I still love you!!

ಹೊಸ ವರ್ಷದ ಶುಭಾಶಯಗಳು

2008-12-31T16:45:00.003+05:30

ಸೌರ ದೀಪ

2008-10-02T16:34:00.006+05:30

ನಾವು ಮನೆ ಕಟ್ಟಿಸುತ್ತಿದ್ದಾಗ ಒಬ್ಬ ಸೌರ ದೀಪ ಮಾರಾಟ ಪ್ರತಿನಿಧಿ ಸೌರ ದೀಪ ಹಾಕಿಸಲು ದಂಬಾಲು ಬಿದ್ದ. ಆಗಲಿ ಎಂದು ಅಮ್ಮ ಅವನಿಗೆ ಹೇಳಿ ಅವನ ವಿಸಿಟಿಂಗ್ ಕಾರ್ಡ್ ಪಡೆದುಕೊಂಡಿದ್ದರು. ನಂತರ ನಾವು ಅವನನ್ನು ದೀಪಕ್ಕಾಗಿ ಕರೆಯಲೇ ಇಲ್ಲ. ನೀರು ಕಾಯಿಸಲು ಆಗಲೇ ಮಾಡಿನ ಮೇಲೆ ಸೌರ ತಟ್ಟೆಗಳಿದ್ದರಿಂದ ಇದರ ಬಗ್ಗೆ ಅಷ್ಟೊಂದು ಕಾಳಜಿ ಕೊಡಲಿಲ್ಲ. ಮೊನ್ನೆ ರಾಜ್ಯದಲ್ಲಿ ವಿದ್ಯುತ್ ಕ್ಷಾಮ ಎದುರಾದಾಗಲೇ ಅದರ ಅವಶ್ಯಕತೆ ಕಂಡು ಬಂದಿದ್ದು.

ಕತ್ತಲೆಯಲ್ಲಿ ವಿದ್ಯುತ್ ಇಲ್ಲದಿದ್ದಾಗ ಎಮರ್ಜೆನ್ಸಿ ಲ್ಯಾಂಪ್‌ಗಳು ಹಲವಾರು ಉಪಯೋಗಿಸಿದ್ದಿದೆ. ಹಲವಾರು ಬಾರಿ ವಿವಿಧ ಕಳಪೆ ಎಮರ್ಜೆನ್ಸಿ ಲ್ಯಾಂಪ್‌ಗಳನ್ನು ಒಳ್ಳಯವೆಂದು ಅಂಗಡಿಯವ ಹೇಳಿದ್ದರಿಂದ ಅವುಗಳನ್ನು ಕೊಂಡು ಕೈ ಸುಟ್ಟುಕೊಂಡದ್ದಿದೆ. ಒಂದೊಮ್ಮೆ ಬಿ.ಪಿ.ಎಲ್ ಕಂಪನಿಯ ಎಮರ್ಜನ್ಸಿ ಲ್ಯಾಂಪ್ ಕೊಂಡು ಅದು ಒಂದು ವರ್ಷ ವ್ಯಾರಂಟಿ ಮುಗಿದ ಕೂಡಲೇ ಕೆಟ್ಟಿದ್ದರಿಂದ ಅದೇ ಕಂಪನಿಯ ಕಛೇರಿಗೆ ಹಿಂದಿರುಗಿಸಿದ್ದು ಇದೆ. ಇತ್ತೀಚೆಗೆ ಸೌರ ದೀಪವೊಂದು ಕೊಂಡುಕೊಳ್ಳಬೇಕೆಂಬ ಹಂಬಲ ಹೆಚ್ಚಿದ್ದರಿಂದ ಅದರ ಹುಡುಕಾಟಕ್ಕೆ ಮುಂದಾದೆ.

ಸೌರ ದೀಪಕ್ಕೆ ಹುಡುಕಾಡುತ್ತಿರುವಾಗ ತಿಳಿದದ್ದು "ಎಲ್.ಇ.ಡಿ" ದೀಪಗಳ ಬಗ್ಗೆ. "ಎಲ್.ಇ.ಡಿ" ಎಂದರೆ ಲೈಟ್ ಎಮಿಟಿಂಗ್ ಡೈಯೋಡ್. ಬಹಳ ಕಾಲದಿಂದ ನಮ್ಮ ಹಲವಾರು ವಿದ್ಯುನ್ಮಾನ ಸಾಧನೆಗಳ ಅಂಗವಾಗಿ ಬಳಕೆಯಲ್ಲಿದೆ. ಅದು ಟೀವಿಯಲ್ಲಿ ಕೆಂಪು, ಹಸಿರು ಬಣ್ಣವಾಗಿ, ಸಂಚಾರ ಸಿಗ್ನಲ್ ದೀಪಗಳಲ್ಲಿ ಕಾಣಬಹುದು, ಮೊಬೈಲ್ ಚಾರ್ಜರ್‍ಗಳಲ್ಲಿ, ದೇವರ ಫೋಟೋಗಳಿಗೆ ಅಳವಡಿಸಿರುವುದನ್ನು ಕಾಣಬಹುದು. ಈ "ಎಲ್.ಇ.ಡಿ"ಗಳು ಬಹಳ ಕಡಿಮೆ ವಿದ್ಯುತ್ ಉಪಯೋಗಿಸುತ್ತವೆ. ಆದರೆ ಪ್ರಕಾಶ? ಇತ್ತೀಚಿಗೆ ಅವುಗಳು ಹೆಚ್ಚಿನ ಪ್ರಕಾಶವನ್ನು ಕೊಡುವಂತೆ ತಯಾರಿಸಿದ್ದಾರೆ. ಇತ್ತೀಚೆಗೆ ಎಲ್ಲರೂ ವಿದ್ಯುತ್ ಉಳಿಸಲು "ಸಿ.ಎಫ್.ಎಲ್" ದೀಪಗಳನ್ನು ಉಪಯೋಗಿಸುತ್ತಿದ್ದೇವೆ. ಮುಂದಿನ ದಿನಗಳಲ್ಲಿ "ಸಿ.ಎಫ್.ಎಲ್" ಸ್ಥಾನವನ್ನು ಈ "ಎಲ್.ಇ.ಡಿ"ಗಳು ತುಂಬುವುದನ್ನು ನಾವು ಕಾಣಲಿದ್ದೇವೆ. ಸೌರ ದೀಪಗಳಲ್ಲಿ ಹೆಚ್ಚಿನವು "ಸಿ.ಎಫ್.ಎಲ್" ದೀಪವನ್ನು ಅಳವಡಿಸಿಕೊಂಡಿರುವುದನ್ನು ನಾವು ಕಾಣಬಹುದು.

"ಎಲ್.ಇ.ಡಿ"ದೀಪವನ್ನು ಎಮರ್ಜೆನ್ಸಿ ದೀಪವಾಗಿ, ಟಾರ್ಚಗಳಲ್ಲಿ ಇತ್ತೀಚೆಗೆ ಹೆಚ್ಚಾಗಿ ಉಪಯೋಗಕ್ಕೆ ಬರುತ್ತಿರುವುದು ಸಂತೋಷದ ವಿಷಯ. "ಎಲ್.ಇ.ಡಿ"ಯನ್ನು ಬಳಸಿರುವ ಒಂದು ದೀಪವನ್ನು http://thrive.in/brochures/Accendo.pdf ಈ ವಿಳಸದಲ್ಲಿ ಕಂಡೆ. ಇದಕ್ಕೆ ಸೌರ ತಟ್ಟೆ ಅಳವಡಿಸಿದರೆ ಹೆಚ್ಚು ಸಮಯ ಬೆಳಕು ಕೊಡುವ ಒಂದು ದೀಪ ಲಭ್ಯವಾಗುವುದೆಂದು ನನ್ನ ಅನಿಸಿಕೆ.

ಚಿತ್ರ ಕೃಪೆ: solar.envirohub.net/

ಜಲ-ಆಶಯ

2008-09-12T19:04:00.004+05:30

ಎರಡು ಗುಡ್ಡದ ಮಧ್ಯೆ
ಪುಟ್ಟ ಸಾಗರದಂತೆ ನಿಂತ ನೀರು ನೋಡಲೆನಿತು ಚೆನ್ನ
ಈ ಜಲಬಂಧನ
ಕಾರ್ಯವನ್ನು ವರ್ಣಿಸಲು ಇರಬೇಕಿತ್ತು ರನ್ನ
ಈ ಅಂದವನ್ನು ಸೃಷ್ಟಿಸಲು
ನಡೆದವೆಷ್ಟು ಮರಗಳ ಮಾರಣ ಹೋಮ
ಎಷ್ಟು ಪಶು, ಪಕ್ಷಿ, ಜನರು
ಕಳೆದುಕೊಂಡರೋ ತಮ್ಮ ಪೂರ್ವಜರ ಗ್ರಾಮ
ತನ್ನ ಏಳಿಗೆಗಾಗಿ ಕಟ್ಟಿಕೊಂಡ
ಮನುಜ ಈ ಜಲಾಶಯಗಳನ್ನ
ತಮ್ಮ ತಮ್ಮೊಳಗೆ ಕಚ್ಚಾಡುತ್ತಿದ್ದಾನೆ
ಸ್ಥಾಪಿಸಲು ನೀರಿಗಾಗಿ ಹಕ್ಕನ್ನ
ತನ್ನ ಗುರಿ ಸಾಧಿಸಲು
ಏನು ಬೇಕಾದರು ಮಾಡುವನು
ಕೊನೆಗೆ ತಾನೂ ಬದುಕನು
ಇತರರನ್ನೂ ಬದುಕಲು ಬಿಡನು

ಚಿತ್ರ ಕೃಪೆ : fcms.its.utas.edu.au/files/dam-large.JPG

2008-08-15T00:18:00.001+05:30

ಸ್ವಾತಂತ್ರೋತ್ಸವದ

ಶುಭಾಶಯಗಳು

ನಮ್ ಕೋಲಾರದ ಮಂಜ

2008-07-16T21:02:00.001+05:30

ಲುಂಗಿ ಎತ್ತಿ ಕಟ್ಕೊಂಡು
`ಪಿಸ್ತೂಲ್' ಬೀಡಿ ಸೇದ್ಕೊಂಡು
ಹೊಗೆ ಬಿಡ್ತಾ ನಡೀತಾವ್ನೆ ನಮ್ ಮಂಜ
ನಮ್ ಕೋಲ್ ಕೋಲ್ ಕೋಲಾರದ ಮಂಜ
ಕಂಕ್ಳಲ್ ಹುಂಜಾನ್ ಹಿಡ್ಕೊಂಡು
ಕೆಳಗಿನ ಬೀದೀಲ್ ನಡ್ಕೊಂಡು
ಠೀವಿಯಿಂದ ಬರ್‍ತಾವ್ನ್ ನಮ್ ಮಂಜ
ನಮ್ ಕೋಲ್ ಕೋಲ್ ಕೋಲಾರದ ಮಂಜ
ಹುಂಜದ್ ಕತ್ನ ಕತ್ಸಾಕಿ
ಹೊಟ್ಟೆ ಕರುಳ್ನ ಕಿತ್ಹಾಕಿ
ತುಂಡು ತುಂಡು ಮಾಡವ್ನ್ ನಮ್ ಮಂಜ
ನಮ್ ಕೋಲ್ ಕೋಲ್ ಕೋಲಾರದ ಮಂಜ
ಬಿಸಿ ಬಿಸಿ ಮುದ್ದೆ ತೊಳ್ಸ್ಕೊಂಡು
ಹುಂಜದ್ ಕಾಲು ಕಚ್ಕೊಂಡು
ಹೊಟ್ಟೆ ಬಿರಿಯೋಂಗ್ ಉಣ್ತಾವ್ನ್ ನಮ್ ಮಂಜ
ನಮ್ ಕೋಲ್ ಕೋಲ್ ಕೋಲಾರದ ಮಂಜ
`ನೀರಾ' ಕೊಂಚ ಕುಡ್ಕೊಂಡು
ಹಾಸ್ಗೆ ಮೇಲೆ ಬಿದ್ಕೊಂಡು
ಗೊರ್‍ಕೆ ಹೊಡೀತಾವ್ನೆ ನಮ್ ಮಂಜ
ನಮ್ ಕೋಲ್ ಕೋಲ್ ಕೋಲಾರದ ಮಂಜ
೧೫/೦೨/೨೦೦೪

ಇಸ್ಲಾಮಿಕ್ ಉಗ್ರವಾದವನ್ನು ಅರ್ಥೈಸುವಿಕೆ

2008-07-12T00:42:00.001+05:30

ಲೇಖಕರು: ಎಚ್.ಎ.ಗನಿ
ISBN: 81-8318-116-3

ನಾಗರೀಕರನ್ನು ಹಿಂಸಿಸುವುದೇ ಉಗ್ರವಾದ. ಉಗ್ರವಾದವನ್ನು ವಿವಿಧ ರಾಷ್ಟ್ರಗಳು, ಜನರು ವಿವಿಧ ರೀತಿಯಲ್ಲಿ ಅರ್ಥೈಸಿಕೊಂಡಿದ್ದಾರೆ. ತಮ್ಮ ತಮ್ಮ ಅನುಕೂಲಗಳಿಗನುಗುಣವಾಗಿ ಬಣ್ಣಿಸಿಕೊಂಡಿದ್ದಾರೆ, ಬಳಸಿಕೊಂಡಿದ್ದಾರೆ. ಈಗಲೂ ಸಹ ಉಗ್ರವಾದವನ್ನು ಅಳೆಯುವುದಕ್ಕೆ ಒಂದು ಮಾನದಂಡ ಇಲ್ಲದಿರುವುದು ಖೇದಕರ. ಉಗ್ರವಾದದವು ಎಲ್ಲಾ ಧರ್ಮಗಳಲ್ಲೂ ಕಾಣಬಹುದು ಆದರೆ ಅದನ್ನು ಹೆಚ್ಚಾಗಿ ಇಸ್ಲಾಮ್ ಧರ್ಮಕ್ಕೆ ಅಂಟಿಸಲಾಗಿದೆ.

ಯಾವುದೇ ಧರ್ಮ ಹಿಂಸೆಯನ್ನು ಪ್ರಚುರಪಡಿಸುವುದಿಲ್ಲ. ಅಂತೆಯೇ ಇಸ್ಲಾಮ್ ಕೂಡ. ಕೆಲ ಜನರ ಕುಕೃತ್ಯಗಳನ್ನು ಇಡೀ ಇಸ್ಲಾಮ್ ಧರ್ಮಕ್ಕೆ ಅಂಟಿಸುವ ಕಾರ್ಯವನ್ನು ಹಲವಾರು ಮಾಧ್ಯಮಗಳು, ಜನರು ಅವ್ಯಾಹತವಾಗಿ ನಡೆಸುತ್ತಿರುವುದರಿಂದ ಇತರ ಮತಬಾಂಧವರು ಇಸ್ಲಾಮ್ ಧರ್ಮೀಯರನ್ನು ಉಗ್ರವಾದಿಗಳೆಂದು ನೋಡುವಂತೆ ಮಾಡಿದೆ.

`ಜಿಹಾದ್’ ಅನ್ನು ಬಹುಪಾಲು ಎಲ್ಲರೂ ಇಸ್ಲಾಮ್ ಧರ್ಮೀಯರನ್ನು ಸೇರಿಸಿ ತಪ್ಪಾಗಿ ಅರ್ಥೈಸಿಕೊಂಡಿದ್ದಾರೆ. `ಜಿಹಾದ್’ ಎಂದರೆ ಶ್ರಮ, ಹೋರಾಟ. `ಜಿಹಾದ್’ ಎಂದರೆ ತಪ್ಪು ಕಲ್ಪನೆಗಳ, ನೋಟಗಳ ಮತ್ತು ಕೃತ್ಯಗಳ ವಿರುದ್ಧದ ಹೋರಾಟ. `ಜಿಹಾದ್’ ಅನ್ನು ಹಲವರು ಯುದ್ಧಕ್ಕೆ ಹೋಲಿಸಿ, ಉಗ್ರವಾದಕ್ಕೆ ಹೋಲಿಸಿದ್ದಾರೆ. `ಜಿಹಾದ್’ ಅನ್ನು ಸರಿಯಾಗಿ ಅರ್ಥೈಸುವುದೆಂದರೆ ಅದು ಅಜ್ಞಾನ, ಬಡತನ, ಅನಕ್ಷರತೆ, ರೋಗಗಳ ವಿರುದ್ಧದ ಹೋರಾಟ.

ಇಸ್ಲಾಮ್ ಧರ್ಮವು ಶಾಂತಿಯನ್ನು ಬೋಧಿಸುತ್ತದೆ. ಪ್ರವಾದಿ ಮೊಹಮ್ಮದರು ಹೇಳುವಂತೆ “ಯಾವುದೇ ಮುಸಲಿಮ್ಮನು ಇತರೆ ಧರ್ಮೀಯರಿಂದ ತೆಗೆದುಕೊಂಡ ಯಾವ ಕೆಲಸವೂ ಅವರ ಸಾಮರ್ಥಕ್ಕಿಂತ ಹೆಚ್ಚಿದ್ದಲ್ಲಿ, ದುರ್ಗುಣದಿಂದ ಕೂಡಿದ್ದಲ್ಲಿ ಕೊನೆಯ ದಿನದಲ್ಲಿ ನಾನವನ ವಿರುದ್ಧವಾಗಿ ನಿಲ್ಲುತ್ತೇನೆ”. ಈ ಪುಸ್ತಕದಲ್ಲಿ ಲೇಖಕರು ಹಲವಾರು ಉಲ್ಲೇಖಗಳನ್ನು ಬಹಳ ಅಚ್ಚುಕಟ್ಟಾಗಿ ಬಳಸಿಕೊಂಡು ಓದುಗರಿಗೆ ಒದಗಿಸಿದ್ದಾರೆ.

ಉಗ್ರವಾದದ ಯುದ್ಧವು ಮನುಷ್ಯರ ಮನಸ್ಸಿನಲ್ಲಿ ಹುಟ್ಟುತ್ತದೆ. ಅದನ್ನು ಅಲ್ಲೇ ಕಾದಾಡಬೇಕು.

ಮಗು

2008-06-30T15:18:00.001+05:30

ನಮ್ಮ ಎದುರು ಮನೆಯಲ್ಲಿ ಇತ್ತೊಂದು ಮಗು
ಅದರ ಮೊಗ ತುಂಬ ಸದಾ ನಗು
ನನ್ನನ್ನು ಕಂಡಾಗ ಬಿಡುತ್ತಿತ್ತು ಪಿಳಿ ಪಿಳಿ ಕಣ್ಣು
ಅದರ ಕೆನ್ನೆ ಮುಟ್ಟಲು ಬಾಳೆಯ ಹಣ್ಣು
ಎತ್ತಿಕೊಳ್ಳಲು ಅದು ಬೆಚ್ಚಗಿನ ಮುದ್ದೆ
ಅರ್ಧ ದಿನ ಮಾಡುತ್ತಿತ್ತು ಬರೀ ನಿದ್ರೆ
ಆಗಾಗ ಆಡಿಸುತ್ತಿದ್ದೆ ಕೂಸುಮರಿ
ತಿನ್ನಲದಕ್ಕೆ ಇಷ್ಟ ಕಡಲೇಪುರಿ
ನಡೆಯಲು ಕಲಿಯುತ್ತಾ ಇಡುತ್ತಿತ್ತು ಅಂಬೆಗಾಲು
ನಮ್ಮ ಮನೆಗೆ ಬಂದಾಗಲೆಲ್ಲ ನಾನದರ ಆಳು
೦೧/೦೨/೦೩

ಹನಿಗವನಗಳು

2008-06-27T18:21:00.001+05:30

೧. ಆಹಾ! ಎಂಥಾ ಶುದ್ಧ ಗಾಳಿ,
ಏಕೆಂದರೆ! ಇಲ್ಲಿ ನಡೆದಿಲ್ಲ ಕೆಟ್ಟ ಮಾನವನ ದಾಳಿ.

೨. ಹಲವರು ವರ್ಣಿಪರು ನಿನ್ನನ್ನು ಉಪಯೋಗಿಸಿ ಬಹುನುಡಿ
ನಾ ವರ್ಣಿಸಲು ಸಿಗದಿಹುದು ಒಂದೂ ನುಡಿ?
ಕಾರಣ - ನಾ ಹಾಕಿಲ್ಲ ಕನ್ನಡಿ!

ಹಾಲೋಜನ್ ಹಾಕಿಸಿ

2008-06-23T20:42:00.004+05:30

ಕತ್ತಲಲ್ಲಿ ಮೊಪೆಡ್ ಓಡಿಸಲು ಬಹಳ ಕಷ್ಟ ಪಡಬೇಕಾಗಿತ್ತು. ಅದರಲ್ಲಿ ಬರುತ್ತಿದ್ದ ಮಂದ ಬೆಳಕಿನಲ್ಲಿ ಎದುರಿಗೆ ಯಾರಾದರು ಬಂದರೆ ತೀರ ಹತ್ತಿರದವರೆವಿಗೂ ಕಾಣಿಸುತ್ತಿರಲಿಲ್ಲ. ಹತ್ತಿರವಾದಾಗ ಬ್ರೇಕ್ ಹಾಕಿದರೆ ಅದು ಥಟ್ ಅಂತ ನಿಲ್ಲುತ್ತಿರಲಿಲ್ಲ. ಮೊಪೆಡ್‌ಗಳಿಗೆ ಡಿಸ್ಕ್ ಬ್ರೇಕ್ ಇಲ್ಲ ನೋಡಿ! ಈ ರೀತಿ ಹಲವಾರು ಮೈಲುಗಳನ್ನು ಕತ್ತಲಲ್ಲಿ ನನ್ನ ಮೊಪೆಡ್‌ನಲ್ಲಿ ಕ್ರಮಿಸಿದ್ದಿದೆ. ಅದು ಬಹಳ ನಿಯತ್ತಿನ ನಾಯಿಯಂತೆ ನನಗಾಗಿ ಓಡಿದೆ. ಅದನ್ನು ನಾನು ಸಹ ಬಹಳ ಮುತುವರ್ಜಿತನದಿಂದ ನೋಡಿಕೊಂಡಿದ್ದೇನೆ. ಈ ಬೆಳಕಿನ ಸಮಸ್ಯೆಗೆ ಪರಿಹಾರ ಹುಡುಕಬೇಕೆಂದು ನಾನು ಗ್ಯಾರೇಜಿನವನ ಬಳಿ ಅರಿಕೆ ಮಾಡಿಕೊಂಡೆ. ಮೊಪೆಡ್‌ಗಳಲ್ಲಿ ಬ್ಯಾಟರಿ ಇಲ್ಲದಿದ್ದುದರಿಂದ ಬೆಳಕು ಡೈನಮೋದಿಂದ ಹೊರಡುತ್ತದೆ. ಡೈನಮೋ ವಾಹನ ಚಾಲನೆ ಮಾಡಿದಾಗ ಮಾತ್ರ ವಿದ್ಯುತ್ ಉತ್ಪಾದಿಸಿ ವೇಗಕ್ಕನುಸಾರವಾಗಿ ದೀಪದ ಬೆಳಕು ಮೂಡುತ್ತದೆ. ಗ್ಯಾರೇಜಿನವ ಹಾಲೋಜನ್ ದೀಪ ಬಳಸಲು ಸೂಚಿಸಿ ಅದು ಕೊಂಚ ದುಬಾರಿ ಎಂದೂ ಹೇಳಿದ. ಸರಿ ಹಾಲೋಜನ್ ದೀಪ ಹಾಕಲು ಸೂಚಿಸಿದೆ. ಮೊದಲಿನ ಬೆಳಕಿಗೆ ಹೋಲಿಸಿದರೆ ಬೆಳಕು ಬಹಳ ಚುರುಕಾಗಿ ಮೂಡಿ ಬಂದಿದೆ ಹಾಗೂ ಬಹಳ ಉಪಯೋಗವಾಗಿದೆ. ನಿಮ್ಮ ವಾಹನಗಳ ದೀಪಗಳನ್ನು ಹಾಲೋಜೆನ್‌ಗೆ ಬದಲಾಯಿಸಿ ಮತ್ತು ಹೆಚ್ಚು ಬೆಳಕಿನ ಸುರಕ್ಷಿತ ಪ್ರಯಾಣ ಮಾಡಿ.

ದೋಸೆ ಇಲ್ಲ

2008-05-30T17:54:00.003+05:30

ಅಮ್ಮನಿಗೆ ಬೆಂಗಳೂರಿನ ಕೃಷ್ಣರಾಜೇಂದ್ರ ಮಾರುಕಟ್ಟೆ ಅಂದರೆ ಏನೋ ಪ್ರೀತಿ. ಅಲ್ಲಿನ ತರಕಾರಿ, ಹೂ, ಇತ್ಯಾದಿ ನಮ್ಮ ಬಡಾವಣೆಗಳಲ್ಲಿ ಸಿಗುವುದಕ್ಕಿಂದ ಕಡಿಮೆ ದರದಲ್ಲಿ ಹಾಗೂ ತಾಜಾವಾಗಿ ದೊರೆಯುತ್ತದೆ. ನಾವು ಮಾರುಕಟ್ಟೆಗೆ ಹೋದಾಗ ಅಲ್ಲಿನ ಹೋಟೆಲಿನಲ್ಲಿ ಮಸಾಲೆ ದೋಸೆ ತಿನ್ನುವುದು ವಾಡಿಕೆಯಾಗಿತ್ತು. ಚಿಕ್ಕ ಹುಡುಗನಾಗಿದ್ದಾಗ ಮಾರುಕಟ್ಟೆಗೆ ಅಮ್ಮನ ಜೊತೆ ಹೋಗುವುದೆಂದರೆ ಏನೋ ಖುಷಿ. ಖರೀದಿಯ ನಂತರದ ದೋಸೆಯಂತು ಗ್ಯಾರೆಂಟಿ. ನಾನು ಬೆಳೆದಂತೆಲ್ಲ ಅಲ್ಲಿನ ಗಲೀಜು, ಗೌಜು ಕಂಡು ಸಿಡುಕತೊಡಗಿದೆ. ಇತ್ತೀಚೆಗೆ ಅಮ್ಮನ ಜೊತೆ ಮಾರುಕಟ್ಟೆಗೆ ಹೋಗಬೇಕಾಯಿತು. ಎಲ್ಲ ವಸ್ತುಗಳನ್ನು ಕೊಂಡ ಮೇಲೆ ಮಾಮೂಲಿನಂತೆ ದೋಸೆ ತಿನ್ನಲು ಹೊರಟೆವು. ನಾವು ಹೋಗುತ್ತಿದ್ದ ಹಳೆಯ ಹೋಟೆಲ್‌ಗಳೆಲ್ಲ ಮುಚ್ಚಿದ್ದವು. ಬಸ್ಸು ನಿಲ್ದಾಣದ ಎದುರಿಗಿದ್ದ ಹೋಟೆಲ್ಲಿಗೆ ಹೋದೆವು. ಅಲ್ಲಿ ಮಸಾಲೆ ದೋಸೆ ಕೇಳಿದರೆ "ಇಲ್ಲ" ಎಂಬ ಉತ್ತರ. ಅರೆ! ಬೆಂಗಳೂರಿನ ಹೋಟೆಲಿನಲ್ಲಿ ಮಸಾಲೆ ದೋಸೆ ಇಲ್ಲ ಅಂದ್ರೆ ಏನು? ಏಕೆ ಇಲ್ಲವೆಂದು ವಿಚಾರಿಸಿದೆ. ಆಗ ತಿಳಿದ ವಿಷಯ - ಇತ್ತೀಚೆಗೆ ಹೋಟೆಲಿನಲ್ಲಿ ಕೆಲಸಗಾರರು ಖಾಯಂ ಆಗಿ ಉಳಿಯದೆ, ಕೆಲಸ ಮಾಡಲು ಹುಡುಗರು ಸಿಗುತ್ತಿಲ್ಲ. ಆ ಹೋಟೆಲಿನಲ್ಲಿ ಎಷ್ಟೊಂದು ಕುರ್ಚಿಗಳನ್ನು ಬಂದ್ ಮಾಡಿ ಸೇವೆ ಇಲ್ಲವೆಂದು ಬರೆದಿದ್ದರು. ಹೋಟೆಲಿಗೆ ಹೋದ ಕಾರಣದಿಂದ ಅಲ್ಲಿ ಲಭ್ಯವಾದ ಇಡ್ಲಿಯನ್ನು ತಿಂದು ಮರಳಿದೆವು.

ಷೆಲ್ ಪೆಟ್ರೋಲ್

2008-04-10T15:59:00.000+05:30

ಷೆಲ್ ಪಂಪುಗಳು ಶುರುವಾದಾಗ ಏನೋ ಒಂಥರಾ ಅನುಭವವಾಯಿತು. ಅದುವರೆವಿಗೂ ಆಯ್ದ ಭಾರತ್ ಪೆಟ್ರೋಲಿಯಂ ಪಂಪುಗಳಿಗೇ ಸೀಮಿತವಾಗಿದ್ದ ನಾನು ಷೆಲ್ ಪಂಪು ಕಂಡಾಗ ಅದರ ಸ್ವಚ್ಛತೆ, ಉಚಿತ ಗಾಳಿ, ಶೌಚಾಲಯ ವ್ಯವಸ್ಥೆ, ಉಚಿತವಾಗಿ ಕಾರಿನ ಗಾಜನ್ನು ಒರೆಸುವಿಕೆ ಇತ್ಯಾದಿ ಕಂಡು ಪುಳಕಗೊಂಡೆ. ಅಲ್ಲೇ ಪೆಟ್ರೋಲ್ ತುಂಬಿಸುತ್ತಿದ್ದೆ. ನಮ್ಮ ಸರಕಾರಿ ಸ್ವಾಮ್ಯದ ಪಂಪುಗಳಲ್ಲಿ ಏಕೆ ಈ ರೀತಿ ಇಲ್ಲ ಎಂದು ಅಲ್ಲಗಳೆಯುತ್ತಿದ್ದೆ. ನಾನು ಹೊಸ ದಿಚಕ್ರವಾಹನ ಕೊಂಡಾಗ ಮೊದಲ ಬಾರಿ ಪೆಟ್ರೋಲ್ ತುಂಬಿಸಲು ಷಲ್ ಪಂಪಿಗೇ ಹೋದೆ. ಹೀಗೆ ದಿನ ಕಳೆದಂತೆ ಷೆಲ್ ಪಂಪುಗಳಲ್ಲಿ ಸಾಮಾನ್ಯ ಪೆಟ್ರೋಲ್ ಅಲಭ್ಯವಾಗುತ್ತಿತ್ತು. ಅಲ್ಲಿ ಸ್ಪೆಷಲ್ ಪೆಟ್ರೋಲ್ ಇರುತ್ತಿತ್ತು. ನಮ್ಮ ಕಛೇರಿಯ ಬಳಿ ಇರುವ ಪಂಪಿನಲ್ಲಿ ಆ ರೀತಿಯಾಗುತ್ತಿದೆ, ಇತರೆ ಷೆಲ್ ಪಂಪಿನಲ್ಲಿ ಸಿಗುತ್ತದೆ ಎಂದುಕೊಂಡಿದ್ದೆ. ಒಮ್ಮೆ ಬೇರೆ ಷೆಲ್ ಪೆಟ್ರೋಲ್ ಪಂಪಿನಲ್ಲೂ ವಿಚಾರಿಸಿದೆ. ಅಲ್ಲೂ ಸಾಮಾನ್ಯ ಪೆಟ್ರೋಲ್ ಇಲ್ಲ. ಹೀಗೆ ಯಾವ ಷೆಲ್ ಪಂಪುಗಳಲ್ಲೂ ಸಾಮಾನ್ಯ ಪೆಟ್ರೋಲ್ ಇಲ್ಲದಂತಾಗಿ ನಾನು ಪುನಃ ಭಾರತ್ ಪೆಟ್ರೋಲಿಯಂ ಪಂಪುಗಳಿಗೆ ಎಡತಾಕುವಂತಾಯಿತು.

ಒಂದು ಪುಸ್ತಕದಲ್ಲಿ ಪೆಟ್ರೋಲಿನಲ್ಲಿ ಸಾಮಾನ್ಯ ಮತ್ತು ಅಸಾಮಾನ್ಯ (ಸ್ಪೆಷಲ್) ಎಂಬುದು ಇಲ್ಲ, ಎಲ್ಲ ಬುರುಡೆ ಎಂದು ಓದಿದ್ದ ನೆನಪಿದ್ದುದರಿಂದ ಅಸಾಮಾನ್ಯ ಪೆಟ್ರೋಲ್ ಹೆಚ್ಚು ಹಣ ತೆತ್ತು ತುಂಬಿಸಲು ಮನ ಒಪ್ಪುತ್ತಿರಲಿಲ್ಲ. ಯಾವುದೇ ಸೇವೆ ಉಚಿತವಾಗಿ ಬರಲು ಸಾಧ್ಯವೇ! ಆ ಸ್ವಚ್ಛತೆ, ಉಚಿತ ಗಾಳಿ, ಇತ್ಯಾದಿಗಳಿಗೆಲ್ಲ ಬರಲು ಹೇಗೆ ಸಾಧ್ಯ. ಅದಕ್ಕಾಗಿಯೆ ಸಾಮಾನ್ಯ ಪೆಟ್ರೋಲ್ ಅಲಭ್ಯವಾಗಿದೆ ಈ ಪಂಪುಗಳಲ್ಲಿ ಎಂದು ಜರಿಯುತ್ತಿದ್ದೆ.

ಮೊನ್ನೆ ಪತ್ರಿಕೆಗಳಲ್ಲಿ ರಿಲಯನ್ಸ್ ಪಂಪುಗಳು ಮುಚ್ಚಿದ ಬಗ್ಗೆ ವರದಿ ಕಂಡಾಗ ಸತ್ಯ ಅರಿವಾಯಿತು. ಸರಕಾರಿ ಸ್ವಾಮ್ಯದ ಪಂಪುಗಳಿಗೆ ಸಬ್ಸಿಡಿಗಳು ಲಭ್ಯ ಆದರೆ ಈ ಖಾಸಗಿ ಪಂಪುಗಳಿಗೆ ಸಬ್ಸಿಡಿಗಳು ಇಲ್ಲದ್ದರಿಂದ ಅವು ಮುಚ್ಚುವಂತಾಗಿದೆ ಹಾಗು ಅವರು ಮಾರುಕಟ್ಟೆ ಯಲ್ಲಿ ಉಳಿಯುವುದಕ್ಕಾಗಿ ಅಸಮಾನ್ಯ ಪೆಟ್ರೋಲ್ ಮಾರಾಟ ಮಾಡುವಂತಾಗಿದೆ.

ಸಿಹಿ ಗಾಳಿ

2007-12-21T18:30:00.000+05:30

ಆ ದಿನಗಳು ಚಿತ್ರದ “ಸಿಹಿ ಗಾಳಿ” ಹಾಡು ನೋಡಿದಾಗಲೆಲ್ಲ ಬಹಳ ವರ್ಷಗಳ ಹಿಂದೆ ಬಂದ “ಪಲ್ಲವಿ ಅನುಪಲ್ಲವಿ” ಚಿತ್ರದ “ನಗುವ ನಯನ” ಹಾಡು ಎದುರು ಬರುತ್ತದೆ. ಈ “ಸಿಹಿ ಗಾಳಿ” ಹಾಡಿನ ಚಿತ್ರೀಕರಣ ಕೂಡ ಮ.ಗಾ ರಸ್ತೆಯ ಸುತ್ತ ಮುತ್ತ ಇದ್ದು “ನಗುವ ನಯನ” ಹಾಡು ಕೂಡ ಮ.ಗಾ ರಸ್ತೆಯ ಸುತ್ತಲೇ ಇದೆ. ಹಾಡು ಸುಮಧುರವಾಗಿದ್ದು “ನಗುವ ನಯನ” ಹಾಡನ್ನು “ಸಿಹಿ ಗಾಳಿ” ಮೂಲಕ ಹೊಸದಾಗಿ ಕಂಡಂತೆ ಭಾಸವಾಗುತ್ತದೆ.

ರಾಜ್ಯೋತ್ಸವ !

2007-11-30T22:30:00.000+05:30

ರಾಜ್ಯೋತ್ಸವದ ಶುಭಾಶಯ ಹೇಳ್ಲೇ ಇಲ್ಲವಲ್ಲ. ಕನ್ನಡದ ಬ್ಲಾಗ್ ಆಗಿದ್ದೂ ರಜ್ಯೋತ್ಸವದ ಶುಭಾಶಯ ಹೇಳದಿದ್ದರೆ ಹೇಗೆ. ಬಹಳ ದಿನಗಳಿಂದ ರಾಜ್ಯೋತ್ಸವದ ಶುಭಾಶಯ ತಿಳಿಸಬೇಕೆಂದರು ಬೆಂಬಿಡದ ಕೆಲಸಗಳು, ಬಿಡುವೇ ಇಲ್ಲದೆ ಒದ್ದಾಡುತ್ತಿದ್ದೆ. ಹೀಗಿದ್ದಾಗೆ ನೆನ್ನೆ ಒಂದು ವಿಚಿತ್ರ ಕಂಡೆ. ಪುಟ್ಟೇನಹಳ್ಳಿ ಜೆ.ಪಿ.ನಗರಕ್ಕೆ ಅಂಟಿಕೊಂಡ ಒಂದು ಹಳ್ಳಿ, ಈಗ ಬಡಾವಣೆ. ನಾವು ಅಲ್ಲಿ ನೆಲಸಲು ಬಂದಾಗ ಒಂದೇ ಬಸ್ಸು, ಒಂದೇ ವಾಹನ ಓಡಾಡುವಷ್ಟು ರಸ್ತೆ. ಕೆರೆ ತುಂಬಿ ತುಳುಕುತ್ತಿತ್ತು. ಸ್ವಚ್ಛವಾದ ನೀರು. ಬೆಂಗಳೂರು ಬೆಳೆದಂತೆಲ್ಲ ಇಲ್ಲಿ ಹಕ್ಕಿಗಳ ಹಾಗೆ ಜನ ಬಂದು ನೆಲಸತೊಡಗಿದರು, ನನ್ನಂತೆ ಇತರರಂತೆ. ಹೀಗೆ ಈ ಸಣ್ಣ ಒಂದೇ ವಾಹನ ರಸ್ತೆ ಹದಗೆಡುತ್ತಾ ಬಂತು. ಓಡಾಡಲು ದುಸ್ತರವಾಯ್ತು. ಆಗಿದ್ದದ್ದು ಒಂದೇ ಒಂದು ಕನ್ನಡದ ಬಾವುಟ ಪುಟ್ಟೇನಹಳ್ಳಿ ವೃತ್ತದಲ್ಲಿರುವ ಮಹಾಲಕ್ಷೀ ಗುಡಿಯ ಎದುರು. ಹೆಚ್ಚು ಕಾಲ ಹರಿದೇ ಹಾರಾಡುತ್ತಿದ್ದ ಈ ಬಾವುಟದ ಕಥೆ ಕೇಳುವವರೇ ಇಲ್ಲ. ಹೀಗಿತ್ತು ಈ ಕನ್ನಡದ ಸ್ಥಿತಿ ಇಲ್ಲಿ. ರಸ್ತೆ ಹದಗೆಟ್ಟು ಮೂರು ವರ್ಷಗಳೇ ಕಳೆದರೂ ಯಾರೂ ಹೆಚ್ಚಾಗಿ ತಲೆ ಕೆಡಿಸಿಕೊಂಡಿರಲಿಲ್ಲ. ಜೆ.ಪಿ.ನಗರ ೭ & ೮ ನೇ ನಿವಾಸಿಗಳ ಸಂಘವನ್ನು ಬಿಟ್ಟರೆ. ಆರು ತಿಂಗಳ ಹಿಂದಷ್ಟೇ ಒಂದು ಒಳ್ಳೆ ರಸ್ತೆ ನಿರ್ಮಾಣವಾಯಿತು. ಕುಮಾರಸ್ವಾಮಿ ಅದನ್ನು ಉದ್ಘಾಟಿಸಿದರು. ಆಗ ಶುರುವಾಯಿತು ನೋಡಿ ಕನ್ನಡ ಸಂಘಗಳ ದಂಡು - ಗೌರವ ನಗರದ ಬನಶಂಕರಿ ಕನ್ನಡ ಯುವಕರ ಸಂಘ, ಬ್ರಿಗೇಡ್ ಮಿಲೆನಿಯಮ್ ಗೃಹಸ್ತೋಮದ ಹತ್ತಿರ ವಿಶ್ವೇಶ್ವರಯ್ಯ ಕನ್ನಡ ಬಳಗ, ಪುಟ್ಟೇನಹಳ್ಳಿ ಪಾಳ್ಯದಲ್ಲಿ ವೀರಕೇಸರಿ ಕನ್ನಡ ಯುವಕರ ಸಂಘ. ವಿಶ್ವೇಶ್ವರಯ್ಯ ಕನ್ನಡ ಬಳಗ ಒಂದು ಕನ್ನಡ ಕಟ್ಟೆಯನ್ನು ಕಟ್ಟಿಸಿ ಕುಮಾರಸ್ವಾಮಿ ಯವರಿಂದ ಉದ್ಘಾಟಿಸಿದ್ದರು.

ರಸ್ತೆ ಹದಗೆಟ್ಟಿದ್ದಾಗ ಈ ಎಲ್ಲ ಕನ್ನಡ ಸಂಘಗಳು ಎಲ್ಲಿ ಇದ್ದವು ಎಂಬುದೇ ತಿಳಿಯದಾಗಿದೆ ಇನ್ನು. ವೀರಕೇಸರಿ ಕನ್ನಡ ಸಂಘ ರಾಜ್ಯೋತ್ಸವ ಆಚರಿಸಿತು. ಆಚರಣೆಯಲ್ಲಿ ಆರ್ಕೆಸ್ಟ್ರ ಮತ್ತು ಕುಣಿತ ಇಟ್ಟಿದ್ದರು. ಎಂಥಾ ಹಾಡುಗಳವು. ನಾನು ಕೆಲಸ ಮುಗಿಸಿ ವಾಹನದಲ್ಲಿ ಬರುತ್ತಿದ್ದಾಗೆ ಕೇಳಿ ದಂಗಾದೆ, ನೋಡಿ ಆಶ್ಚರ್ಯಪಟ್ಟೆ. "ಪುಲ್ಲಿಂಗ, ಸ್ತ್ರೀಲಿಂಗ ಅಂಗಂಗ ಪಲ್ಲಂಗ" ಎಂಬ ರವಿಚಂದ್ರನ್ ಹಾಡು, ಹಾಡಿಗೆ ನೃತ್ಯ ನೀಡುತ್ತಿದ್ದ ಯುವತಿ. ಸುತ್ತೆಲ್ಲ ನೋಡುತ್ತಿದ್ದ ಪಡ್ಡೆ ಹೈಕಳು, ಶಿಳ್ಳೆ ಏನೂ ಎಂತ. ಅದರ ಮಜಾನೇ ಬೇರೆ. ಈ ರೀತಿ ಕನ್ನಡ ರಾಜ್ಯೋತ್ಸವ ಆಚರಣೆ ನಮಗೆ ಬೇಕೆ. ಕನ್ನಡ ಸಂಸ್ಕೃತಿಯೆಂದರೆ ಇದೇನೇ?

ರಾಮ ಸೇತು ಬಗ್ಗೆ ಒಂದು ಚಿತ್ರ?

2007-10-07T22:16:00.001+05:30

೨೦೦೨ ರ ಇಸವಿಯಲ್ಲಿ "ಹಿಂದು" ಎಂಬ ಉಪೇಂದ್ರ ನಟನೆಯ ಕನ್ನಡ ಚಿತ್ರ ಮೂಡುವುದೆಂದು ಅದರ ಮುಹೂರ್ತಕ್ಕೆ ಬಾಳಾ ಠಾಕ್ರೆ ಬರುವರೆಂದು ಸುದ್ದಿ ಇತ್ತು. ಶ್ರೀರಾಮ ಬಿಲ್ಲನ್ನು ಹಿಡಿದು ನಿಂತಂತಿರುವ ಇದರ ಜಾಹೀರಾತುಗಳು ಹಲವು ಪತ್ರಿಕೆಗಳಲ್ಲಿ ನೋಡಿದ ನೆನಪು. ಆದರೆ ಅದು ಬೆಳಕು ಕಾಣಲಿಲ್ಲ. ಇತ್ತೀಚೆಗೆ ರಾಮ ಸೇತು ಒಡೆದು ಹೊಸ ಸೇತುವೆ ನಿರ್ಮಾಣ ಮಾಡಲು ಸರಕಾರಗಳ ಹೊರಟಿವೆ. ಹೊಸ ಸೇತುವೆ ನಿರ್ಮಾಣವಾಗಿ ಅದು ಸದಾ ಅವಘಡಕ್ಕೊಳಗಾಗಿ ಅದು ಕೊನೆಗೆ ಮುಚ್ಚಲ್ಪಡುವ ಒಂದು ಕಾಲ್ಪನಿಕ ಚಿತ್ರ ಮೂಡಿಬಂದರೆ ಈ ಸಮಯಕ್ಕೆ ಹೆಚ್ಚು ಪ್ರಶಸ್ತವೆನಿಸಬಹುದೇನೋ?

ಮಗಾ, ಮಚ್ಚ, ಕಿಚ್ಚ?

2007-09-25T23:21:00.000+05:30

ನಮ್ಮ ಹುಡುಗರು ಮಗಾ, ಮಚ್ಚ ಅಂತೆಲ್ಲ ಕರೀತಿದ್ರು. ಆದ್ರೆ ಈ ಮಗಾ, ಮಚ್ಚ ಅಂದ್ರೆ ಏನು ಅಂತ ಯೋಚಿಸುತ್ತಿದ್ದೆ, ವಿಚಾರಿಸುತ್ತಿದ್ದೆ. ಸಮಂಜಸ ಉತ್ತರ ದೊರೆಯಲೇ ಇಲ್ಲ. ಇತ್ತೀಚೆಗೆ ನನಗೆ ಹೊಳೆದ ಮಟ್ಟಿಗೆ ಮಗ ಅಂದರೆ ಮಹಾತ್ಮ ಗಾಂಧಿ (ಮ.ಗ) ಎಂದು ಮಚ್ಚ ಎಂದರೆ ಮಚ್ಚು ಹಿಡಿದವನೆಂದು (ಮೂರು ಕಣ್ಣುವುಳ್ಳವನೇ ಮುಕ್ಕಣ್ಣ ನೆಂಬ ರೀತಿಯಲ್ಲಿ) ಅರ್ಥೈಸಬಲ್ಲೆ. ಹುಚ್ಚ ಚಿತ್ರ ನೋಡಿದವರಿಗೆ ಕಿಚ್ಚ ಅಂದ್ರೆ ಏನು ಎಂಬ ಪ್ರಶ್ನೆಗೆ ಉತ್ತರ ಹುಡುಕುವ ಸಂದರ್ಭ ತಿಳಿದಿರಬಹುದು. ಕಿಚ್ಚ ಅಂದ್ರೆ ಕಿಚ್ಚು, ಇತ್ಯಾದಿ ಉತ್ತರಗಳು ಬಂದು ಹೋಗುತ್ತವೆ. ಆದರೆ ಕಿಚ್ಚ ಅಂದರೆ ಕಿಶೋರ ಚಂದ್ರ (ಕಿ.ಚ) ಎಂದು ಇತ್ತೀಚೆಗಷ್ಟೇ ಹೊಳೆಯಿತು.

ಅಲ್ಪ ಬುದ್ಧಿ

2007-08-14T22:11:00.000+05:30

ಮೈಗಳ್ಳರ ಬಗ್ಗೆ ರಾಜ-ಮಂತ್ರಿಯ ಕಥೆ ಓದಿದ್ದೇ - "ರಾಜ ಕೈಲಾಗದವರಿಗಾಗಿ ಕೆಲವು ಮನೆಗಳನ್ನು ಕಟ್ಟಿಸಿದ್ದ. ಆದರೆ ಮೈಗಳ್ಳರೆಲ್ಲ ಕೈಲಾಗದವರಂತೆ ನಟಿಸಿ ಆ ಮನೆಗಳನ್ನು ಆಕ್ರಮಿಸಿದ್ದರು. ಚಿಂತಿತನಾದ ರಾಜ ಮಂತ್ರಿಯೊಂದಿಗೆ ಮೈಗಳ್ಳರನ್ನು ಓಡಿಸಲು ಉಪಾಯ ಕೇಳಿದ. ಅದಕ್ಕೆ ರಾಜ ಒಂದು ದಿನ ಆ ಮನೆಗಳಿದ್ದ ಕಡೆ ಸಭೆ ಕರೆದು ನಿಮಗೆಲ್ಲ ಸುಂದರವಾದ ಹೊಸ ಮನೆಗಳನ್ನು ಅನತಿ ದೂರದಲ್ಲಿ ಕಟ್ಟಿಸಿದ್ದೇವೆ. ನಿಮಗೆ ಇಷ್ಟ ಬಂದ ಮನೆಗಳಿಗೆ ಬೇಗ ಸೇರಿಕೊಳ್ಳಿ ಎಂದು ಸಾರಿದ. ಆಗ ಓಡಲು, ನಡೆಯಲು ಸಾಧ್ಯವಾದವರು ಆ ದಿಕ್ಕಿನಲ್ಲಿ ನಡೆದರು. ಕೈಲಾಗದವರು ಅಲ್ಲೇ ಉಳಿದರು" - ಹೀಗೆ ಕೈಲಾಗದವರು ಮತ್ತು ಮೈಗಳ್ಳರನ್ನು ಬೇರ್‍ಪಡಿಸಿದ ಮಂತ್ರಿ.

ಬೆಂಗಳೂರಿನಲ್ಲಿ ಎಲ್ಲಾದರೂ ಓಡಾಡುವಾಗ ಭಿಕ್ಷುಕರ ಕಾಟ. ಹೊಟೆಲ್‌ಗಳ ಹತ್ತಿರ, ಉದ್ಯಾನವನದಲ್ಲಿ..... ಹೀಗೆ ಹಲವಾರು ಭಿಕ್ಷುಕರನ್ನು ನೋಡಿದ ನಾನು (ಬಹಳಷ್ಟು ಮಂದಿ ಮೈಗಳ್ಳರು) ಇತ್ತೀಚೆಗೆ ಮಲ್ಲೇಶ್ವರದಲ್ಲಿ ನನ್ನ ತಾಯಿಯ ಜೊತೆ ದರ್ಶಿನಿ ಹೋಟೆಲ್ನಲ್ಲಿ ಬೀದಿ ಬದಿಯಲ್ಲಿ ತಿನ್ನುತ್ತಿರುವಾಗ ಒಬ್ಬ ಬ್ಯಾಂಡೇಜ್ ಸುತ್ತಿದ್ದ ಯುವಕ ಬಂದ. ನಾನು ತಿನ್ನುತ್ತಿದ್ದ ತಿಂಡಿಯ ಕಡೆ ನೋಡಿದ, ನನ್ನನ್ನು ನೋಡಿದ. ತಿನ್ನಬೇಕೆನಿಸಿತೋ ಏನೋ? ನಾನು ಭಿಕ್ಷುಕರ ಹಾವಳಿಯಿಂದ ಬೇಸತ್ತು ಆತನ ಕಡೆ ನೋಡಬಾರದೆನಿಸಿ ಬೇರೆಡೆ ಮುಖ ತಿರುಗಿಸಿ ತಿನ್ನ ತೊಡಗಿದೆ. ಆದರೆ ತಿಂಡಿ ಸೇರೀತೆ? ತಿಂಡಿ ತಿನ್ನಲು ಮನಸ್ಸು ಬರದೇ, ಆತನ ಕಡೆ ನೋಡಿದೆ. ಕಡೆಗೆ ೧೦ ರೂಪಾಯಿ ನೀಡಿ ತಿಂಡಿ ತಿನ್ನಲು ಹೇಳಿದೆ. ಆತ ದುಡ್ಡು ತೆಗೆದುಕೊಳ್ಳಲಿಲ್ಲ. ಕೊನೆಗೆ ನಾನೇ ಇಡ್ಲಿ ಪಾರ್ಸಲ್ ಮಾಡಿಸಿ ಕೊಟ್ಟೆ. ಆದರೆ ಆತನಿಗೆ ತಿನ್ನಲು ಮನಸ್ಸು ಬರಲಿಲ್ಲ. ಆತನಿಗೆ ಇಹ ಲೋಕದ ಪರಿವೆಯೇ ಇಲ್ಲ. ಆತನೊಬ್ಬ ಹುಚ್ಚನಾಗಿದ್ದ. ಆತ ಮೊದಲ ನಾನು ತಿನ್ನುತ್ತಿದ್ದ ತಿಂಡಿಯನ್ನು ನೋಡಿದಾಗ ಕೊಟ್ಟಿದ್ದರೆ ತಿನ್ನುತ್ತಿದ್ದನೋ ಏನೋ? ಎಲ್ಲರನ್ನೂ ಒಂದೇ ಅಳತೆಗೋಲಿನಿಂದ ಅಳೆಯುವ ಈ ನನ್ನ ಅಲ್ಪ ಬುದ್ಧಿಗೆ ಬೆಂಕಿ ಬೀಳಲೆಂದು ಆಶಿಸಿ ಬೇಸರದಿಂದ ಅಮ್ಮನೊಡನೆ ಮುಂದೆ ನಡೆದೆ.

ಸ್ನೇಹ

2007-08-12T16:16:00.000+05:30

ಸ್ನೇಹ ಎಂಬ ಸಾಗರದಲ್ಲಿ
ಒಂದು ಪುಟ್ಟ ಮೀನು ನಾನು
ಆ ಸಾಗರದ ಚಿಪ್ಪಿನಲ್ಲಿ ಸಿಕ್ಕ
ಸ್ವಾತಿ ಮುತ್ತು ನೀನು

ಈ ಹೃದಯದ ಗೂಡಲ್ಲಿ
ಮುತ್ತನ್ನು ಕಾಪಾಡುವೆ ನಾನು
ತೊರೆಯದೆ ನೆಲೆ ನಿಲ್ಲುವೇ ಇಲ್ಲಿ
ಎಷ್ಟು ದಿನ ನೀನು?

(ನನ್ನ ಇತ್ತೀಚಿನ ಹನಿ ಗವನ)

ಒಂದು ಕ್ಯಾಮೆರಾ ಕಥೆ

2007-04-25T16:47:00.000+05:30

ಕ್ಯಾಮೆರಾ ಅಂದರೆ ನನಗೆ ಏನೋ ಹುಚ್ಚು. ನಾನು ಮೊದಲು ಕ್ಯಾಮೆರಾ ಕೊಳ್ಳಲು ಬಹಳ ವರ್ಷಗಳೇ ಕಾಯಬೇಕಾಯಿತು. ಅದಕ್ಕೂ ಮುಂಚೆ ಬಂಧುಗಳ, ಸ್ನೇಹಿತರ ಕ್ಯಾಮೆರಾಗಳನ್ನು ಉಪಯೋಗಿಸಿದೆ. ಆದರೆ ಬೇರೊಬ್ಬರ ಕ್ಯಾಮೆರಾ ಉಪಯೋಗಿಸಲು ಏನೋ ಮುಜುಗರ. ಹಾಗಾಗಿ ಹೇಗಾದರೂ ಮಾಡಿ ಒಂದು ಕ್ಯಾಮೆರಾ ಕೊಂಡುಕೊಳ್ಳಬೇಕೆಂದು ೧೯೯೯ ರಲ್ಲಿ ಬೋನಸ್ಸ್ ದುಡ್ಡಿನಲ್ಲಿ ಒಂದು ಮುಕ್ಕಾಲು ಸಾವಿರ ರೂಪಾಯಿಯ ಒಂದು ಕ್ಯಾಮೆರಾ ಕೊಂಡುಕೊಂಡೆ. ನನ್ನ ಮೊದಲ ಕ್ಯಾಮೆರಾ ಒಲಿಂಪಸ್. ಕ್ಯಾಮೆರಾ ಕೊಂಡುಕೊಂಡದ್ದೇನು ಸರಿ ಆದರೆ ಅದಕ್ಕೆ ರೀಲು, ಮುದ್ರಣ ಹಾಕಿಸುವುದು ದುಬಾರಿಯಾಗಿ ಕಂಡಿತು. ಬಹಳ ಅಪರೂಪಕ್ಕೆ ಮಾತ್ರ ಉಪಯೋಗಿಸುವಂತಾಯಿತು. ಹಲವು ರೀಲುಗಳು ಮುದ್ರಣಕ್ಕೆ ಕಾಸು ಸಾಲದೆ ಹಾಗೆ ಉಳಿದವು, ಕಳೆದವು. ನಂತರ ದೀಪಾವಳಿ ಪಟಾಕಿ ಚೀಟಿಯ ಜೊತೆ ಒಂದು ಕ್ಯಾನನ್ ಕ್ಯಾಮೆರಾ ಸಿಕ್ಕಿತು. ನಂತರ ಸೀಲಿಂಗ್ ಫ್ಯಾನ್ ಕೊಂಡಾಗ ಬ್ಯಾಟರಿ ರಹಿತ ಕ್ಯಾಮೆರಾ ಉಚಿತವಾಗಿ ದೊರೆಯಿತು. ಕ್ಯಾಮೆರಾಗಳು ಇದ್ದರೂ ಅದರ ವೆಚ್ಚಗಳು ದುಬಾರಿಯಾದ್ದರಿಂದ ಇದ್ದೂ ಇಲ್ಲದಂತಾದವು. ಮದುವೆ ನಿಷ್ಕರ್ಷೆಯಾದಾಗ ಕ್ಯಾಮೆರಾದ ಅವಶ್ಯಕತೆ ಕಂಡಿತು. ಆದರೆ ಆ ಹಳೆಯ ಕ್ಯಾಮೆರಾಗಳು, ರೀಲು, ಮುದ್ರಣ ವೆಚ್ಚಗಳೆಲ್ಲ ಹೊಚ್ಚ ಹೊಸ ಡಿಜಿಟಲ್ ಕ್ಯಾಮೆರಾ ಕೊಳ್ಳಲು ಪ್ರೇರೇಪಿಸಿದುವು. ಅಷ್ಟು ದುಬಾರಿಯಲ್ಲದ ಒಂದು ಒಳ್ಳೆಯ ಡಿಜಿಟಲ್ ಕ್ಯಾಮೆರಾ ಕೊಳ್ಳುವುದೆಂದು ನಿರ್ಧರಿಸಿ ಮೂರ್‍ನಾಲ್ಕು ಅಂಗಡಿ ತಿರುಗಿ ಹತ್ತು ಸಾವಿರದ ಒಳಗಿನ ಒಂದು ಕ್ಯಾಮೆರಾ ಕೊಳ್ಳುವುದೆಂದು ನಿರ್ಧರಿಸಿದೆ. ಆಗ ವಿಜ್ಹ್ ಅಂಗಡಿಯವರು ಕ್ಯಾಮೆರಾಗಳ ಮೇಲೆ ರಿಯಾಯಿತಿ ಇದೆಯೆಂದು ಪತ್ರಿಕೆಗಳಲ್ಲಿ ಜಾಹೀರಾತು ಕೊಟ್ಟಿದ್ದರು. ಸರಿ ಹೋಗಿ ನೋಡುವ ಎಂದು ಹೊರಟೆ. ಅಲ್ಲಿ ಹೋದಾಗ ಹದಿಮೂರು ಸಾವಿರದ ಒಂದು ಕ್ಯಾಮೆರಾ ನನಗೆ ತುಂಬಾ ಹಿಡಿಸಿತು. ಆದರೆ ಕೊಳ್ಳಲು ದುಬಾರಿಯೆನಿಸಿ ಅಂಗಡಿಯಿಂದ ಹೊರಬಿದ್ದೆ. ನಂತರ ಮನೆಗೆ ಬಸ್ಸು ಹಿಡಿಯಲು ನಡೆಯುತ್ತಾ ಹೊರಟೆ. ನಂತರ ಮೊಬೈಲ್ಗಳೆಲ್ಲ ಈಗ ಹದಿನೈದರಿಂದ ಇಪ್ಪತ್ತು ಸಾವಿರ ಇರುವಾಗ ಕ್ಯಾಮೆರಾಗೆ ಅಷ್ಟು ದುಡ್ಡು ಸರಿಯಾಗಿಯೇ ಇದೆಯೆನಿಸಿತು. ಮನೆ ತಲುಪಿದೆ, ಯೋಚಿಸಿದೆ. ಒಂದು ಕ್ಯಾಮೆರಾ ಕೊಳ್ಳಲು ಇಷ್ಟೊಂದು ಕಸರತ್ತೆ? ಛೇ!! ಮಾರನೆಯ ದಿನ ಹೊರಟು ವಿಜ್ಹ್ ಅಂಗಡಿ ತಲುಪಿದೆ. ನೋಡಿದರೆ ಹದಿಮೂರು ಸಾವಿರದ ಕ್ಯಾಮೆರಾ ಕೆಳಗಡೆ ಇಪ್ಪತ್ತು ಸಾವಿರದ ಪ್ರೊಫೆಷನಲ್ ಕ್ಯಾಮೆರಾ ಕಂಡಿತು. ಅದರ ಪಕ್ಕದಲ್ಲಿ ಅದೇ ಮಾದರಿಯ ಕ್ಯಾಮೆರಾ ಕೆಲ ದಿನಗಳ ಹಿಂದೆ ಬಂದದ್ದು ಇತ್ತು. ಅದರ ಬೆಲೆ ಇಪ್ಪತ್ನಾಲ್ಕು ಸಾವಿರ. ಅದೇ ಕ್ಯಾಮೆರಾ ಆದರೆ ನಾಲ್ಕು ಸಾವಿರದ ಉಳಿತಾಯ! ಜೀವನದಲ್ಲಿ ಅಪರೂಪಕ್ಕೊಮ್ಮೆ ಕೊಳ್ಳುವ ವಸ್ತು ಕ್ಯಾಮೆರಾ. ಕೊಂಚ ದುಬಾರಿಯಾದರೂ ಒಳ್ಳೆಯದೇ ಕೊಳ್ಳುವ ಎನಿಸಿ ಇಪ್ಪತ್ತು ಸಾವಿರದ ಕ್ಯಾಮೆರಾವನ್ನು ಕೊಂಡುಕೊಂಡು ಅಂಗಡಿಯಿಂದ ಹೊರಬಿದ್ದೆ. ಅತಿ ಶೀಘ್ರದಲ್ಲೇ ಒಂದು ಚಿತ್ರಗಳ ಬ್ಲಾಗ್ ತೆರೆಯಲು ನಿರ್ಧರಿಸಿರುವೆ. ವೀಕ್ಷಿಸುವಿರಿ ತಾನೇ?

ಸಂತರು ಮತ್ತು ಪತ್ರಿಕೆ

2007-04-04T18:47:00.000+05:30

ಲಂಕೇಶ್ ಪತ್ರಿಕೆಯ ಲಂಕೇಶ್ ಬದುಕಿದ್ದ ತನಕ ಉತ್ತುಂಗಕ್ಕೇರಿದ್ದ ಪತ್ರಿಕೆ ಅವರ ಮರಣಾನಂತರ ಅಷ್ಟೊಂದು ಪ್ರಚಾರದಲ್ಲಿಲ್ಲವೆಂದು ಭಾಸವಾಗುತ್ತಿದೆ. ಹಾಗೇ ಹಾಯ್! ಬೆಂಗಳೂರು. ಲಂಕೇಶ್ ಇದ್ದಾಗ ಹಾಯ್ ಬೆಂಗಳೂರು ಅಷ್ಟೊಂದು ಪ್ರಚಾರದಲ್ಲಿರಲಿಲ್ಲ. ಈ ಪತ್ರಿಕೆಗಳು ಒಂದು ವ್ಯಕ್ತಿಯಮೇಲೆ ನಿಂತಿರುವುದರಿಂದ ಹಾಗೆಯೇ? ಅಥವಾ ಬದಲಾವಣೆಯ ಗಾಳಿಯಿಂದಾಗಿ ಹಾಗೆಯೇ? ಬಲ್ಲವರು ತಿಳಿಸಿ.

ಸಂತರ ಕಡೆ ತಿರುಗಿದಾಗಲೂ ಅದೇ ಅನಿಸುತ್ತಿದೆ. ಪುಟ್ಟಪರ್ತಿ ಸಾಯಿಬಾಬಾ ಶಕ್ತರಾಗಿ ಇದ್ದಾಗ ಶ್ರೀ ರವಿಶಂಕರ್‍ ರವರು ಅಷ್ಟೊಂದು ಬೆಳಕಿಗೆ ಬರಲಿಲ್ಲ. ಏಕೆ ಹೀಗೆ. ಒಂದು ಸೂರ್ಯನಿದ್ದಾಗ ಇನ್ನೊಬ್ಬ ಸೂರ್ಯ ಕಣ್ಣಿಗೆ ಕಾಣನೇ? ಕಾಲವೇ ತಿಳಿಸಬೇಕು.

ಕಲ್ಪನೆ

2007-03-05T20:37:00.000+05:30

ನಮ್ಮ ಕಛೇರಿಯ ತಂತ್ರಜ್ಞಾನದ ತೊಂದರೆಗಳನ್ನು ಒಂದು ತಂತ್ರಂಶದ ಮೂಲಕ ತಿಳಿಸಬೇಕು. ಅದನ್ನು ದೂರವಾಣಿ ಮೂಲಕ ವಿಚಾರಿಸಲು ತಂತ್ರಜ್ಞರು ಇರುತ್ತಾರೆ. ಹೀಗೆ ಹಲವಾರು ತೊಂದರೆಗಳನ್ನು ದಿನಾ ತಂತ್ರಾಂಶದ ಮೂಲಕ ತಿಳಿಸುತ್ತಿದ್ದೆ. ಒಂದು ದಿನ ಇಂಪಾದ ಹೆಣ್ಣು ಧ್ವನಿ ನನ್ನ ತೊಂದರೆಯನ್ನು ಆಲಿಸಲು ನನ್ನ ವಿಸ್ತರಣೆಗೆ ಕರೆ ಮಾಡಿತು. ಕೇಳಿದೊಡನೆ ಆ ಹುಡುಗಿ ಹೇಗಿರಬಹುದೆಂದು ಊಹಿಸತೊಡಗಿದೆ. ಹೇಗೆ ನಗಬಹುದು, ನೋಡಲು ಹೇಗೆ ಇರಬಹುದೆಂದು. ಬೆಳದಿಂಗಳ ಬಾಲೆಯ ಹಾಗೆ….. ಹೀಗೆ ನನ್ನ ತೊಂದರೆಗಳನ್ನು ಇತರ ಗಂಡು ಧ್ವನಿ, ಹೆಣ್ಣು ಧ್ವನಿಗಳು ಆಲಿಸುತ್ತಿದ್ದವು. ಆದರೆ ಆ ಇಂಪಾದ ಧ್ವನಿ ಕೇಳಿದಾಗಲೆಲ್ಲ ಏನೋ ಖುಷಿ, ಬೆಳದಿಂಗಳ ಬಾಲೆಯ ಕಲ್ಪನೆ…. ಒಮ್ಮೆ ಆಕೆಯಿಂದ ವಿಂಚೆ (e-mail) ಬಂತು, ಈ ವಾರಾಂತ್ಯ ಈ ಕಛೇರಿಯಲ್ಲಿ ನನ್ನ ಕೊನೆಯ ದಿನ. ನನ್ನನ್ನು ಸಂಪರ್ಕಿಸಲು ಈ ವಿಂಚೆ ವಿಳಾಸ, ಮೊಬೈಲ್ ಸಂಖ್ಯೆ ವಿವರಗಳೊಂದಿಗೆ. ತಡಮಾಡದೆ ಮೊಬೈಲ್ ಹಚ್ಚಿದೆ. ಪರಿಚಿತ ಧ್ವನಿಯಾದ್ದರಿಂದ ಸ್ವಾಗತಿಸಿದ ಆಕೆ, ಮದುವೆ ನಿಶ್ಚಯವಾದ್ದರಿಂದ ತಾನು ಕೆಲಸ ಬಿಡುತ್ತಿರುವರೆಂದು ತಿಳಿಸಿದರು. ಆಕೆಗೆ ಆಕೆಯನ್ನು ನೋಡುವ ನನ್ನ ಹಂಬಲ ತಿಳಿಸಿದೆ. ಸ್ವಾಗತಿಸಿದ ಆಕೆಯನ್ನು ನೋಡಲು ಹೊರಟೆ. ಭೇಟಿ ಮಾಡಿದೆ. ಆದರೆ..... ನನ್ನ ಕಲ್ಪನೆಯ ಹುಡುಗಿ ಅಲ್ಲಿರಲಿಲ್ಲ. ವಾಸ್ತವಕ್ಕೆ ಬಂದು ಆಕೆಗೆ ಶುಭಾಶಯ ಕೋರಿದೆ. ನನ್ನ ಕಲ್ಪನೆಯ ಹುಡುಗಿಯೇ ಆ ಧ್ವನಿಗೆ ಸೂಕ್ತವೆಂದು ನನ್ನ ಕಾರ್ಯಸ್ಥಾನಕ್ಕೆ ಮರಳಿದೆ.

ಸಂಚಾರಿ ಅ-ರಕ್ಷಕಕ

2007-01-22T20:36:00.000+05:30

ಇಂದು ಬನ್ನೇರುಘಟ್ಟ ರಸ್ತೆಯಲ್ಲಿ ಒಬ್ಬ ಲಾರಿ ಚಾಲಕನಿಗೆ ಸಂಚಾರಿ ಆರಕ್ಷಕ ಅಧಿಕಾರಿ ತನ್ನ ಶಿರಸ್ತ್ರಾಣದಿಂದ ಹೊಡೆಯುತ್ತಿದ್ದುದಕ್ಕೆ ಮೂಖ ಸಾಕ್ಷಿಯಾಗಿ ನಿಂತಿದ್ದೆ. ತನ್ನ ಷೂವನ್ನು ಬಿಚ್ಚಿ ಹೊಡೆಯಲು ಹೊರಟಿದ್ದ ಆ ಅಧಿಕಾರಿ. ಫ್ಲೈಓವರ್‍ ಗಳಿರುವುದರಿಂದ ಬೇಗ ಕೆಲಸ ತಲುಪಬಹುದೆಂಬ ಆಶಯದಿಂದ ಬನ್ನೇರುಘಟ್ಟ ರಸ್ತೆ ಮೂಲಕ ಪಯಣಿಸಿದ ನಾನು ಈ ಒಂದು ಘಟನೆ ಮನ ಕಲಕಿತು. ಲಾರಿ ಚಾಲಕ ತಪ್ಪೇ… ಇಲ್ಲ ಅನಿಸಿತು. ಆತ ಲಾರಿಯನ್ನು ಈ ರಸ್ತೆಗೆ ಕಲ್ಲುಗಳನ್ನು ಹೊತ್ತು ತಂದಿದ್ದ. ಈ ರಸ್ತೆಯಲ್ಲಿರುವ ಕಲ್ಲಿನಂಗಡಿಗಾಗಿ. ರಸ್ತೆ ಚಿಕ್ಕದಿದ್ದರಿಂದ ವಾಹನ ತಿರುಗಿಸಲು ಕಷ್ಟವಾಗಿತ್ತು. ಆತ ಶ್ರಮ ಪಟ್ಟು ತಿರುಗಿಸುವಷ್ಟರಲ್ಲಿ ಇತರೆ ವಾಹನಗಳು ತಾಳ್ಮೆ ಕಳೆದುಕೊಂಡು ಹಿಂದೆ ಮುಂದೆ ನುಗ್ಗಿ ಅವನಿಗೆ ಇನ್ನಷ್ಟು ತೊಂದರೆ ಕೊಟ್ಟಿದ್ದವು. ಲಾರಿ ತಿರುಗಿಸಲಾಗದೆ ಸಂಚಾರ ಅಸ್ತವ್ಯಸ್ತವಾಗಿತ್ತು. ಈ ಆರಕ್ಷಕರಿಗೆ ಕೈ ಬೆಚ್ಚಗೆ ಮಾಡಿದ್ದರೆ ಸುಮ್ಮನೆ ಇರುತ್ತಾರೆ. ಎಷ್ಟೋ ಸಲ ಜಯಚಾಮರಾಜೇಂದ್ರ ರಸ್ತೆಯಿಂದ ಪೂರ್ಣಿಮಾ ಚಿತ್ರಮಂದಿರದ ರಸ್ತೆಕಡೆಗೆ ಲಾರಿ ನಿಷಿದ್ಧ ಇದ್ದರೂ ಈ ಆರಕ್ಷಕರೆ ಮಾಮೂಲು ತೆಗೆದುಕೊಂಡು ಲಾರಿಗಳನ್ನು ಬಿಟ್ಟಿದ್ದಾರೆ. ಕೆಲ ದಿನಗಳ ಹಿಂದೆಯಷ್ಟೇ ರಸ್ತೆ ದಾಟುತ್ತಿದ್ದ ತರುಣಿ ಸುಮ್ಮನಿದ್ದವಳು ಇದ್ದಕ್ಕಿದಂತೆ ಚಲಿಸಿ ನನ್ನ ವಾಹನದ ಚಕ್ರಕ್ಕೆ ತನ್ನ ಅಂಗಾಲನ್ನು ಸಿಕ್ಕಿಸಿದ್ದಳು. ನನ್ನ ದುರಾದೃಷ್ಟಕ್ಕೆ ಅಲ್ಲೇ ಮುಂದೆ ಸಂಚಾರಿ ಆರಕ್ಷಕ ವಾಹನವನ್ನು ಅತೀರೇಕವಾಗಿ ಓಡಿಸುತ್ತಿದ್ದೇನೆಂದು, ಲೈಸ್ಸೆನ್ಸನ್ನು ಕಸಿದುಕೊಂಡರು. ಇದು ನನ್ನ ತಪ್ಪಲ್ಲವೆಂದು, ವಾಹನ ಅತೀ ನಿಧಾನವಾಗಿ ಚಲಿಸುತ್ತಿದ್ದೆನೆಂದು ಹೇಳಿದರೂ ಒಪ್ಪದೇ ಇದ್ದಾಗ ನೂರು ರೂಪಾಯಿಗಳನ್ನು ಅವರ ಛೇಲ(ಮುಫ್ತಿಯಲ್ಲಿರುವ ಸಹದ್ಯೋಗಿಯೇ?)ನಿಗೆ ಕೊಟ್ಟು ಲೈಸ್ಸೆನ್ಸ ಬಿಡಿಸಿಕೊಂಡೆ.

ಆಸಿಡ್ ಪಾತಕಿ

2006-11-29T23:49:00.000+05:30

ಆಸಿಡ್ ಎರಚಿದ್ದ ಪಾತಕಿ ಮೆಹಬೂಬ್‌ಗೆ ಜೀವಾವದಿ ಶಿಕ್ಷೆ ಎಂಬ ವರದಿ ಇಂದು ಪತ್ರಿಕೆಗಳಲ್ಲಿ ಬಂದಿದೆ. ಜೀವಾವದಿ ಶಿಕ್ಷೆ ಜೊತೆಯಲ್ಲಿ ಕಠಿಣ ಶಿಕ್ಷೆಯನ್ನು ಇಂತಹ ವಿಕೃತರಿಗೆ ನೀಡಬೇಕು. ಜೀವಾವದಿ ಶಿಕ್ಷೆ ನೀಡಿದರೆ ಅಷ್ಟೇನು ನೋವನ್ನು ಅವರು ಅನುಭವಿಸರು. ಇಂತಹವರ ಮುಖಕ್ಕೆ ಆಸಿಡ್ ಎರಚಿ ಮುಖವನ್ನು ವಿಕೃತಗೊಳಿಸಿದಾಗ ಮಾತ್ರ ಅದರ ನೋವು ಅವರಿಗೆ ತಿಳಿಯುವುದು. ಆಸಿಡ್ ಎರಚಿಸಿಕೊಂಡವರ ಬದುಕು ನೆನೆಸಿಕೊಳ್ಳಲು ಅಸಾಧ್ಯ. ಅವರು ತಮ್ಮ ವಿಕೃತ ಮುಖ ತೋರಿಸಲು ಆಗದೆ ಗೃಹಬಂಧನದಲ್ಲಿ ಸಾಯುವ ತನಕ ಬದುಕ ಬೇಕು. ಆಸಿಡ್ ಎರಚುವವರಿಗೆ ಧಿಕ್ಕಾರ.

ಇಂಕ್ಸ್ಕೇಪ್

2006-11-28T14:11:00.000+05:30

ಇಂಕ್‌ಸ್ಕೇಪ್ ಎಂಬ ಉಚಿತ ಚಿತ್ರರಚನಾ ತಂತ್ರಾಂಶ ಉಪಯೋಗಿಸಿದೆ. ಅದರ ಕಾರ್ಯಕೌಶಲ ಕಂಡು ಬೆರಗಾದೆ. ಸುರುಳಿ, ಚೌಕ, ವಿಚಿತ್ರ ಆಕೃತಿಗಳನ್ನು ನಮ್ಮ ಕಲ್ಪನೆಗೆ ತಕ್ಕಂತೆ ಸುಲಭವಾಗಿ ರಚಿಸಬಹುದು. ರಚಿಸಿದ ಚಿತ್ರಗಳನ್ನು ವಿವಿಧ ಬಣ್ಣಗಳಿಗೆ ಬದಲಿಸಬಹುದು. ಸಮಯವನ್ನು ಕ್ರಿಯಾತ್ಮಕವಾಗಿ ಮಾಡಲು ಇಂದೇ ಭೇಟಿ ನೀಡಿ. http://www.inkscape.org/

ನನ್ನ ಮೆಚ್ಚಿನ ಗಣಕ ಪರದೆ - ೫

2006-10-16T17:16:00.000+05:30

ನನ್ನ ಮೆಚ್ಚಿನ ಗಣಕ ಪರದೆ - ೪

2006-09-19T21:46:00.000+05:30

ನನ್ನ ಮೆಚ್ಚಿನ ಗಣಕ ಪರದೆ - ೩

2006-09-15T12:33:00.000+05:30

ನನ್ನ ಮೆಚ್ಚಿನ ಗಣಕ ಪರದೆ - ೨

2006-09-13T12:52:00.000+05:30

ನನ್ನ ಮೆಚ್ಚಿನ ಗಣಕ ಪರದೆ (ವಾಲ್ಪೇಪರ್‍)

2006-09-09T12:02:00.000+05:30

ಗುರಿಯಿಲ್ಲದ ತೊಳಲಾಟ

2006-09-04T15:41:00.000+05:30

ಗುರಿಯಿಲ್ಲದೆ ಈ ಜೀವನ ನಡೆದಿದೆ. ಸದಾ ಕಾಡುವ ಕೆಲಸ, ಕೆಲಸಗಳು ಹೆಚ್ಚಾದಂತೆಲ್ಲ ನಿಯಮಿತ ಕಾರ್ಯಗಳ ಕಡೆ ಗಮನ ಕಡಿಮೆಯಾಗುತ್ತಾ ಹೋಗುತ್ತದೆ. ಆದರೆ ಒಮ್ಮೊಮ್ಮೆ ಆ ಹೆಚ್ಚುವರಿ ಕೆಲಸಗಳಿಗೆ ನಾನು ತಾಯಾರಿಲ್ಲ ಯಾಕೆ ಎಂದು ಯೋಚಿಸಿದ್ದುಂಟು. ಉತ್ತರ ಇನ್ನೂ ಸಿಕ್ಕಿಲ್ಲ.

ತಗ್ಗಿ ಬಗ್ಗಿ ನಡಿ !!

2006-06-24T17:24:00.000+05:30

ಅದೊಂದು ದಿನ ನನ್ನ ಸಹೋದ್ಯೋಗಿಯ ಮದುವೆಗಾಗಿ ಚೆಂದವಾದ ಬಿದಿರಿನ ಕೊಳವೆಯಿಂದ ಮಾಡಿದ ಹೂ ಇರಿಸಬಹುದಾದ ಕುಂಡ ಕೊಂಡುಕೊಂಡೆ. ಅದು ಬಹಳ ಅಪರೂಪದ್ದೂ, ಸುಂದರವಾಗಿಯೂ ಇತ್ತು. ಕೆಲವೊಂದು ವಸ್ತುಗಳು ಆ ಸಮಯವನ್ನು ಬಿಟ್ಟರೆ ಮತ್ತೆ ಬೇಕೆಂದರೂ ಸಿಗಲಾರವು, ಎಷ್ಟೇ ಹುಡುಕಿದರೂ. ಅದನ್ನು ಪೇಪರಿನಲ್ಲಿ ಸುತ್ತಿ ಒಂದು ಕವರಿನಲ್ಲಿ ಇರಿಸಿ ನನ್ನ ದ್ವಿಚಕ್ರವಾಹನದಲ್ಲಿ ನೇತುಹಾಕಿ ಮನೆಗೆ ಹೊರಟೆ. ಮಹಾಬೋಧಿ ಆಸ್ಪತ್ರೆಯ ಸಿಗ್ನಲ್ಲಲ್ಲಿ ನಿಲ್ಲುವ ಪಟ್ಟಿಯಲ್ಲಿ ಸರಿಯಾಗಿ ಗಾಡಿ ನಿಲ್ಲಿಸಿದೆ. ಹಿಂದಿನಿಂದ ಒಬ್ಬ ಕೈನೆಟಿಕ್ ಸವಾರ ಬಂದು ನನ್ನ ಗಾಡಿಯ ಮುಂದೆ ನಿಲ್ಲಿಸಿದ. ನನಗೆ ಕೋಪ ಬಂತು. ನಾನು ಸರಿಯಾಗಿ ಪಟ್ಟಿಯ ಬಳಿ ನಿಂತಿದ್ದರೂ ಇವನು ನನಗಿಂತ ಮುಂದೆ ಬಂದು ನಿಲ್ಲಿಸಿದ್ದಾನಲ್ಲ ಎಂದು. ಹಸಿರು ದೀಪ ಬಿದ್ದೊಡನೆ ಅವನನ್ನು ಬೆನ್ನಟ್ಟಿ ಹಿಂದಿಕ್ಕಬೇಕೆಂಬ ಈರ್ಷೆಯಿಂದ ವೇಗ ಹೆಚ್ಚುಮಾಡಿದೆ. ಪೈಪೋಟಿ ಪ್ರಾರಂಭ!! ಇಬ್ಬರೂ ವೇಗದಲ್ಲಿದ್ದೆವು. ಸ್ವಲ್ಪ ದೂರ ಕ್ರಮಿಸಿದಂತೆ ಏನೋ ಭಾರಿ ಸದ್ದು, ನನ್ನದಲ್ಲ ಎಂದುಕೊಳ್ಳುತ್ತಿರಲು ದೂರದಿಂದ ಯಾರೋ ಕೂಗತೊಡಗಿದರು, ನಿಲ್ಲಿಸಿ ನೋಡಿದರೆ ಅದು ನಾನು ಕೊಂಡ ಆ ಅಪರೂಪದ ಬಿದಿರಿನ ಹೂ ಕುಂಡ, ರಸ್ತೆಯಲ್ಲಿ ಬಿದ್ದು ಚೂರಾಗಿತ್ತು. ಆಗ ಹಿರಿಯರ ಹಿತವಚನ “ತಗ್ಗಿ ಬಗ್ಗಿ ನಡಿ” ನೆನಪು ಮೂಡಿತು. ಕಾಲ ಮಿಂಚಿತ್ತು. ಅಂದಿನಿಂದ ರಸ್ತೆಯಲ್ಲಿ ಪೈಪೋಟಿಗೆ ಇಳಿಯುವುದನ್ನು ನಿಲ್ಲಿಸಿದೆ.

ಎಲ್ಲರೊಳೊಂದಾಗದಿರು ಮಂಕುತಿಮ್ಮ

2006-05-16T07:05:00.000+05:30

ಅಂದು ಬಸ್ಸಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಜಯನಗರ ೫ ನೇ ಬ್ಲಾಕಿನ ನಿಲ್ದಾಣದಲ್ಲಿ ಒಬ್ಬ ಕುರುಡಿ “ಮಾರ್ಕೆಟ್‌ಗೆ ಹೋಗುತ್ತಾ, ಮಾರ್ಕೆಟ್‌ಗೆ ಹೋಗುತ್ತ” ಎಂದು ನಿಂತ ಬಸ್ಸಿನೆಡೆ ಕೂಗಿ ಕೇಳುತ್ತಿದ್ದಳು. ಅದು ಮಾರ್ಕೆಟ್ ಬಸ್ಸೇ, ಆದರೂ ಯಾರೂ ಹೋಗುತ್ತೆ ಎನ್ನಲಿಲ್ಲ. ಚಾಲಕ, ನಿರ್ವಾಹಕರೂ ಆತುರದಲ್ಲಿದ್ದರು. ನಾನೂ ಸುಮ್ಮನಿದ್ದೆ, ಇಳಿದು ಆ ಕುರುಡಿಯನ್ನು ಬಸ್ಸಿಗೆ ಹತ್ತಿಸಬಹುದಿತ್ತು, ಆದರೆ ಬಸ್ಸಿನಲ್ಲಿ ಎಲ್ಲರಂತೆಯೇ ನಾನೂ ಮೂಕ ಪ್ರೇಕ್ಷಕನಾಗಿದ್ದೆ. ಆ ನಿಲ್ದಾಣದಿಂದ ಮಾರ್ಕೆಟ್ ಕಡೆಗೆ ಹೊರಡುವ ಬಸ್ಸುಗಳು ತೀರ ಕಡಿಮೆ. ಒಂದು ಬಸ್ಸು ತಪ್ಪಿದರೆ ಕಡಿಮೆಯೆಂದರೂ ಒಂದು ಘಂಟೆ ಕಾಯಬೇಕು, ಮುಂದಿನ ಬಸ್ಸಿಗಾಗಿ, ನಂತರವೂ ಇದೇ ಪಾಡಾದರೆ……. ಈಗನ್ನಿಸುತ್ತಿದೆ “ಎಲ್ಲರೊಳಗೊಂದಾಗದಿರು ಮಂಕುತಿಮ್ಮ” ಎಂದು.

ಏನನ್ನು ಬರೆಯಲಿ

2006-05-03T02:04:00.000+05:30

ಮೊದಮೊದಲು ಬ್ಲಾಗನಲ್ಲಿ ಏನು ಬರೆಯಬೇಕೆಂದು ಆಲೋಚಿಸುತ್ತಿರುವೆ. ನನ್ನ ಕೆಲವು ಕವನಗಳನ್ನು ಕೊಡಲೇ – ಅದಕ್ಕಾಗಿ ಅಂತರ್ಜಾಲ ಪುಟ ಹೊಸಚಿಗುರು ಇದೆ, ಮತ್ತೇನು ಬರೆಯುವುದು ಎಂಬ ಆಲೋಚನೆಯಲ್ಲಿರುವೆ